Pampers Coupon

琴日經過萬寧見佢做緊75折,加上記起有媽媽話買尿片有尿片送,所以就走入去行個圈順便睇下有咩買!

一直有儲開尿片Coupon既我,其中有一張係Pampers Coupon(買S碼可減$15),由於10月尾到期,所以決定用左佢吾好浪費!

買左一包Pampers特級棉柔S碼62片裝$108.5-$15Coupon=$93.5,再送以下尿片(M碼特級棉柔10片裝一包,L碼超薄乾爽3片裝一包)

美讚臣入會禮物(2)

上兩星期收到美讚臣手襪仔已經覺得幾靚好實用,點之今日再收到隔尿墊重靚!一打開見到隻翠兒好Q呀,下面重有一隔係方便放尿片,濕紙巾等物品,好方便實用!

咁啱我又想買塊靚少少既隔尿墊出街用,而家又可以吾洗買住喇!

5最高分
禮物吸引:

40週 @ 等...等...等

25/10/2012(40W)
今日已經係40週喇,龍BB依然係好愛媽媽個肚吾肯出黎!為左吾想催生,我依幾日開始會食多D涼野谷一谷佢(好似好衰咁)!龍BB....你吾好怪媽媽呀!

而家間中都會肚痛,吾知係咪心理作用,個肚一Feel到痛就會望一望個鐘計時,但係次次痛既時間都吾同,原來又係假陣痛,好無引!其實講真,我真係吾識分點先係初頭既真陣痛,有D人話似M痛(間中都會喎),有D人又話會全個肚"拿"住痛(間中都會"拿"住"拿"住,不過係"拿"一個部位,而吾係全個肚囉)!有時真係好驚吾識分陣痛,傻下傻下咁由得佢而影響龍BB,但係母親大人話一定要見紅穿水先當係,個肚痛下痛下可以不理,等佢見紅穿水先入院喎(係咪架??)!另外有時個肚一痛會連埋陰部都痛,好似針吉咁,會有刺痛既感覺!

依幾日,我同龍B爸身邊D朋友,龍BB契媽,契爺,家人,親戚,同事等個個都好關心龍BB既近況,出世未呀!真係好多謝大家既愛護&關心,攪到佢地好似重緊張過我同龍B爸!

吾知係咪龍BB知道媽咪11月5日生日,所以想同媽咪生日接近D一齊慶祝呢(入院催生11月2日)!?但係我真係吾想係醫院過生日囉!!

龍BB......Daddy媽咪已經預備好一切去迎接您既來臨喇,好多人都等緊&期待您出世呀,出到黎大把哥哥姐姐,Uncle,Auntie陪您玩,包您開心過係媽咪個肚度,您快D乖乖自己出黎啦!錫晒您!

醫院約催生

22/10/2012(39W4D)
今日返左醫院產檢,第一次駁機Check半個鐘胎動&心跳,之後再同我按下個肚&度下Size,一切正常!

由於接近40週,所以E生同我約埋下次入院催生日期,但係一等就要等到11月2號,即41週1日先入院催生,其實我真係吾想拖到11月囉,問個E生可吾可以早幾日入院,但佢話通常都要等到42週先會同人催生&加上催生有一定風險可能會影響到BB,所以寧願BB自己出黎!跟住E生重建議我下星期一(40週4日)再返去醫院再檢查多次喎,唉...心念,咁不如直接入院催生啦!但醫生死都吾肯,係要等到11月2號(41週1日),無計!

我見好多媽媽大約會在40週就催生,但係點解我重要等到41W1D呀......好心急呀!!!

39週 @ 倒數一星期

18/10/2012(39W)
39週喇,但係龍BB重未有動靜,吾知佢係咪係我個肚度好食好住太舒服吾想出黎呢?但係我同龍B爸真係好期待快D見龍BB呀!原來望到終點但又要係度等個種感覺真係幾痛苦!

雖然話已經進入大直路,但係吾知點解反而覺得係成個懷孕過程中最辛苦(除左生仔個刻)!我依兩個星期每晚都要去兩至三次洗手間,好似定左生理時鐘咁,去到最尾個次就訓吾返(通常都係4,5點),所以每晚都只係訓到3至4個鐘!一係就痕醒左訓吾返,吾知係咪清胎毒密左,個肚同手腳,身體真係好痕,手腳R損晒,根本痕到訓吾到!攪到我而家晚晚都要話下龍BB,臨尾先要媽咪咁辛苦,再吾快D出黎就要晚晚打Pat Pat!

等我回顧下4-9個月既大肚相先,真係好令人回味!

完美老公

16/10/2012(38W5D)
我有一位完美老公?其實人係無十全十美,不過我都會比老公有98分,其餘2分係咩未念到!

懷孕旅程已經去到尾聲,突然有感而發,好想寫一篇Blog讚好&多謝依位老公,等第時龍BB知道佢有一個咁錫媽咪既好Daddy!

我同龍B爸由2000年拍拖到2006年結婚再到而家2012年終於有龍BB,12年來一直都相處得好開心,個種互相信任,依靠,關懷真係好難用三言兩語認容!雖然我同龍B爸都吾係生長於富有家庭,但係大家都用雙手好努力去經營依個幸福的家,總算有D成果!有時回想都覺得平平淡淡都係一種福氣,要好好珍惜!

其實今次懷有龍BB真係來得不易,婚後念住比幾年時間大家享受下婚姻生活先再生BB!點之就係天意弄人,身邊朋友越係吾想有就偏偏會有,而我越想有就反而越係無!由2010年開始努力足足用左年幾時間,卻換來一次又一次既失望!睇過好多不同中醫調理身子,睇西醫仔細檢查計日子食藥通通失敗,最後連人工受孕都念埋,走去排期都要等到2014年!直到2011年尾心灰意冷一心念住等2014年人工受孕之際,點之過左3個月後既2012年1月發現有左,嘩......知道個刻真係好感恩,我同老公都開心到不禁流淚,原來上天真係一早為我地預備好,正值今年又係龍年,開心到呀爸呀媽,老爺奶奶傻!(吾知點解老一輩特別鍾意龍年)

就係咁開始展開我既新一頁陀B旅程喇!依段日子總算過得輕鬆開心,每晚龍B爸放工飯後會陪我落樓下散步!當佢知道我腳痛腳腫又會臨訓前幫我按摩雙腳!每一個醫院&私人舉辦產前既講座都會陪我去聽!所有私家產檢都會抽時間陪伴我!買任何野比龍BB時都會好細心比不同意見!每晚都吾會嫌悶同龍BB傾下計!有時當我有情緒時,佢只會默默承受,從無反駁怨言(當然我都好少會發佢脾氣,因為真係吾忍心&無咩野會值得我去嬲佢)!總之一切一切都令我暖在心,所以我真係好開心可以同龍B爸共同擁有一個結精品,屬於我地既小生命!

好快我地依個幸福的家會多一位成員,希望以後既日子都會繼續幸福美滿,彼此相愛,代代相傳延續落去!

雪印入會禮物

印象中7月入既雪印會,琴日終於收到禮物喇!佢有本書仔,係可以記錄BB既第一次&成長,又可以放4R相,都幾有意義!

雀巢入會禮物

早兩日收到雀巢入會禮物,相信係聽講座時入會既,因為印象中無係網上登記!

至於禮物方面,因為之前聽講座同BB展都有送雀巢口水肩同紗巾,所以已經有好多喇!

5最高分
禮物吸引:

 

2012年10月一田BB展

上星期同龍B爸去左一田BB展掃貨,今日終於送貨喇!如在場內買滿單一簽賬$500,用恆生卡就有5倍積分&有免費送貨服務!低玩

因為個日係紅日既關係,所以大概10點幾去到念住吾洗點同人迫,點之去到個場好冷清,有D牌子既Sales重係剛剛先開始放野上架!但一過1點就開始人頭湧湧喇!

由於之前已經做左功課,念定有咩要買,所以一去到第一時間就去搵個幾樣先喇!

首先係洗衣液!本來一心念住買思思樂,800ml賣$58/pc(買二送一),平均$38.6/pc,我已經覺得好低!點之我見附近有好多媽媽都圍住一擋掃緊貨,師奶上身既我同龍B爸當然吾放過走去睇下有咩咁低啦!點之發現威潔重低,1L賣緊$57.9(孖裝),即平均$28.9/pc,眼見D媽媽一掃就掃幾Sets走,個Sales EE重忙到不停拆箱!最後我都掃左2 Sets走(今日經過見到樓下藥房賣緊$52/pc,相比之下一田真係好爆低呀!)

 

之後目標係儲奶袋,睇左幾隻牌子都吾啱,念住今次實買吾到啦,但點之經過一擋賣韓國產品,見佢有賣儲奶袋,好奇下問Sales EE個袋有無膠味(因為之前聽過有媽媽話某D牌子有好重膠味)!點之個EE又好好人喎,二話不說就拎左個比我!經一輪研究後覺得又低又實用,所以決定KO佢,一盒$56(30pcs x 200ml)!但佢當時賣到得返3盒,重要無貨返喇,所以我就3盒都掃埋!其實3盒真係吾夠,但無計啦,唯有頂住先!路經時重買左個玩具比龍BB係BB車度玩!




最後目標係Highchair!其實一直龍B爸都覺得吾需要用Highchair既,但後來念深一層,有時抱得手累時又要放龍BB落BB床,而BB床又係房,咁咪好多時都無得睇住龍BB,我又吾想下下都要走入房喎!加上Highchair又可以方便餵龍BB食野,所以就決定買喇!最初同龍B爸都睇中Combi,但後來見好多媽媽都買左Aprica,眼見除左牌子/價錢吾同之外,其他功能大致相同,所以最後都買左Aprica 569 ($1,691),但買完先知買貴左少少,有D媽媽話見過$1,600都有!



其實場內思思樂棉同某D牌子尿片都幾低,不過由於我之前實在掃左太多貨關係,所以要暫時忍手!

清胎毒(白蓮鬚)

11/10/2012(38W)
由37週開始食白蓮鬚清胎毒,而家都Keep住一星期食兩次!

自從食左白蓮鬚之後,發現身體出現左一個變化,就係個肚多左好多紅點&好痕!其實之前都有其他媽媽講過食完會出紅點,吾知依D係咪就係胎毒呢?至於飲完頭暈依樣我就無喇!

 

第七次私家產檢(37W2D)

6/10/2012(37W2D)
第七次私家產檢!今次等左勁耐,由於E生朝早幫人接生,所以遲返診所,足足等左2個幾鐘!

同上次一樣,龍BB依然用手仔擋住塊面&臍帶纏頸一圈!無計,龍BB係要玩神秘,咁唯有等龍BB出世時先可以見面,因為今次係最後一次私家產檢喇,之後個幾星期都會繼續去政府E院做產檢!

今次E生一見到我個肚即時嚇左一跳,佢話我個肚比正常週數Size大,重話龍BB進展得好快,心臟,胎水,手腳,頭仔各樣一切正常!不過輪到度肚時,我就真係比E生嚇親,佢話龍BB個肚已經有40W喇,我第一個反應係"下....咁大,得吾得架"當然E生都係例牌話無問題啦!E生重話龍BB而家已經重6.5磅,出世時應該至少有7磅,屬於中Size偏大!聽完我即刻O左嘴,重即刻望住龍B爸講到生時咪好辛苦!

當我返到屋企突然念起父親大人好耐之前同我講過,依個BB一定會係大隻B,因為龍B爸都屬於高大既人!吾通今次真係比父親大人講中左!

體重: 62KGS(136.4LBS)
肚圍: 40"

用吾用"無痛分勉"好?

7/10/2012(37W3D)
好多FD都會問龍B媽緊吾緊張,但一直既答覆都係話MaMa地,但依兩日突然有D開始緊張&擔心既感覺湧出黎喇,重要有時訓吾著係度左念右念,幻想到時會穿水先定見紅先呢?陣痛有幾痛呢?自已頂吾頂得住呢?過程順吾順利呢?龍B爸會吾會係屋企等時趕吾切黎陪產呢?嘩......吾通依D就係產前恐懼証??

不過當中有一個問題真係好想好想各位媽媽比D意見,就係用吾用"無痛分勉"好呢?其實好耐之前已念定用"無痛分勉"架喇,因為龍B媽好怕痛!但最近見到有D剛生完既媽媽話好後悔用左"無痛分勉",佢地話由吾痛到突然升到上7,8度既痛係重難頂!天呀,真係幻想吾到會點,有無媽媽可以幫手解答下,等我吾好亂念野!

護協

琴日去完私家產檢就順道上去護協睇下有咩買,平時聽就聽得多話個度D野好平,今次都係龍B媽第一次去炸!

上到去地方比想像中細,但真係好多人,不過產品就吾算多!佢門口有大大隻字寫住要有証先可以買野,而龍B媽就有張惠氐卡,其實有一點吾係好明,之前聽好多媽媽又話護協卡有幾折,惠氐卡有幾折......但問個職員時,佢話買野係無分咩卡有幾折,不過一定要有卡先可以買野!咁點解其他媽媽又可以講到咩卡有幾折,另外咩卡又有幾折呢?

由於產品吾多,加上龍B媽之前都已經買到8899,所以最後都只係買左個Minimoto既BB車雨擋,其實龍B媽架BB車牌子係Combi,但龍B媽只係知道得Combi & Minimoto牌子雨擋先可以由頭到腳包晒架BB車,而本身Combi既BB車雨擋大概要$2xx,Minimoto就平一半,不過都要$110,所以最後都買左Minimoto喇!

另外重有一樣係好多媽媽都推介必買,就係1KG棉花,每人限買兩包,每包$27!本來都想買包試下,但由於龍B媽一早已經掃左一箱十包"思思樂"棉,所以都係吾買住喇!不過反而見到好多男人都拎住一包二包!

37週足月la

4/10/2012(37W)
今日37週足月喇!吾知點解心情特別開心,可能因為最近宮縮又密又痛,所以有時都幾擔心會早產,不過而家就放心晒喇!當然,龍BB最好就足39/40週先出世會最好啦,可以係龍B媽肚內作最後衝刺,吸收多D營養!

等龍B媽回顧下有咩已經為龍BB預備好先:
衣服類 ~~ 和尚袍內衣, 包被, 夾衣, 衫仔, 大小毛巾, 帽仔, 手套, 腳套, 口水肩, 肚圍, 襪仔

用品類 ~~ 紗巾, 奶咀, 奶咀錬, 指甲鉗&剪, 水溫計, BB衣架, BB梳, BB床上套裝, BB車掛勾, BB車風扇, 尿片, 奶樽, 牙膠, 學習杯, BB車蓆, 奶粉格, 儲奶袋

清潔類 ~~ 洗衣液, 奶樽清毒煲, 清潔奶樽液, 奶樽刷, 洗頭水, 沐浴露, 海綿, 75%酒精, 沖涼網, 浴盆, 吸鼻器, 棉花棒(臍帶), 清潔綿, 濕紙巾, 換片墊

護膚類 ~~ 按摩油, 潤膚露/乳, 便疹膏, 面霜

玩具類 ~~ 手搖鈴, 布波波

傢俬類 ~~ BB車, BB床, Highchair

重有以下未買:
BB床鈴(朋友會送), 探熱器(吾知邊隻好), 地毯, BB車雨擋, 退熱貼, BB床蓆(吾知需吾需要)

煲薑醋

3/10/2012(36W6D)
前兩日一家人食中秋節團圓飯,二嫂突然問起母親大人開始煲薑醋未!其實母親大人一早已經買定一大袋薑放係娘家,但佢念住38/39W先煲都未遲,不過父親大人同二嫂即刻異口同聲話吾好,大家都覺得而家煲定差吾多,因為一例可以入味D,二例可以功效大D!

直到今日返娘家時見到父親&母親大人開始為我預備薑醋,真係好窩心!味道重好香,即刻就想食

中秋節快樂

30/9/2012(36W3D)
今年中秋過得比較特別,因為係我肚內多左個小生命"龍BB"陪我同龍B爸一齊過!

雖然龍BB要下個月先出世,但龍B媽知道龍BB一定感受到中秋節依份人月團圓,熱熱鬧鬧既氣氛!因為食飯後同左龍B爸落樓下公園散步時(有好多大人細路玩燈籠,勁熱鬧),龍BB踢得特別起勁呢!