爬......爬......爬

7M27D等到我頸都長終於等到龍BB識向前爬喇!其實龍BB上個月都識爬,不過係向後/打圈爬,自從買左playmat之後希望比龍BB多D係地下練爬!終於前兩日見証到佢識向前爬喇!又見証到多一樣成長中既龍BB真係好開心,感覺龍BB又大個囝左喇!
7M25D~媽咪,我得左喇!

星星餅

7M23D其實依篇Blog想寫好耐,但係一直拖下拖下又吾記得左,而家等我同龍BB回顧返先!

早兩個月之前見反斗城星星餅買二送一,所以一早買定左打算比龍BB食,當龍BB啱啱踏入第7個月我就比佢嘗試食星星餅,因為星星餅可以訓練龍BB手指自己拎野食能力,加上又可以當零食,聽聞1歲健康院會考拎星星餅!

而家一日我都會比三四粒龍BB食訓練下手指! 初初幾日龍BB已經識主動用隻手夾住星星餅,不過未識將佢放入口,之後見佢一直都只係用手指夾住而吾係拎住粒星星餅,我就捉住佢母指&食指教佢要拎住黎食,又會自已做示範比佢睇(順便我又食埋一份,哈哈),而家佢已經識自已拎住星星餅喇,不過都重未識大開手放入口,次次都係一個拳頭放入口!

7M~ 第一次試食時放粒星星餅落個蓋度等佢自己研究一輪!

開始想嘗試拎,no no......係夾至啱!

用左BB手勢去夾,好攪笑~~

終於夾到喇!佢平時拎野入口好easy,吾知點解拎星星餅好似好困難,可能太細粒?!

不過未識自己放入口,到最後都要媽咪餵!

一知道咁好味,龍BB個樣即刻開心到好似拎到舊金咁,哈哈!

一筒都算幾多,真係有排食!

父親節2013

7M16D今日係龍ＢＢ第一年同老公過父親節，所以點都要慶祝下補答老公咁辛苦搵錢比我地洗．．．．．．哈哈！

正日實好多人出去食飯，所以我地都係簡簡單單落樓下食一餐當慶祝算喇！話雖如此，依餐父親節飯都要等成粒鐘先有得食！

題外話，今日龍ＢＢ７個月零１６日大既日子係父親節，同時亦係老公下個月１６／７既生日日期，又會咁啱～～

有街出，連飲啖水都開心過人

 

去左元氣食壽司，等左一粒鐘，但只用左４５分鐘食野，因為龍ＢＢ又攪攪陣，加上又要趕返去比佢飲奶奶訓覺，所以依餐真係極速！

美讚臣入會禮物(5)

7M16D今日收到美讚臣入會禮物,係一個吹氣膠波,其實正確d講係一個正方形!因為佢最近出左新盒裝,所以連個形狀都似返新盒裝!

睇落又幾得意,下次可以拎埋去同龍BB游水水喇,順便幫佢賣下廣告!

Huggies入會禮物(5)

7M16D龍ＢＢ初出世無耐Ｂｌｏｇ友Ｋｉｔｍａｎ已經話比我知當龍ＢＢ　６個月大就可以參加Ｈｕｇｇｉｅｓ個半歲生日會，只要當龍ＢＢ　６個月大既個一個月１號上網登記就會有尿片送，不過可惜佢送既係Ｍ碼學習褲，龍ＢＢ早係５個月大時已經著Ｌ碼，所以ｐａｔ大既龍ＢＢ已經著吾落喇，為左吾好浪費會送比朋友仔！

Ｈｕｇｇｉｅｓ依個活動幾好，不過如果有得選擇ｓｉｚｅ就會重ｐｅｒｆｅｃｔ喇！

7個月 01 Jun 2013

7M9D依個月過得好似好快,好似啱啱寫完6個月篇Blog而家又到7個月喇!

回顧返6~7個月既龍BB又大個仔左喇,扭抱多左,鍾意喊多左,不過亦好玩左好多!平時一有街出就寧括興奮,可能出左大半日都吾洗訓覺,真係有得玩大過天,不過當佢一眼訓真係無臉比,即刻高8度叫人抱佢訓!

一早已經識認人認聲既龍BB仍然好癡媽咪,真係要唱首歌迎合下先得'世上只有媽媽好.....'可能因為咁既緣故,我覺得同佢真係有種心連心既感覺,當佢有時玩得激動搣得我痛個陣,我一嗌痛佢真係會識放開手手跟住定格望住我再溫柔咁輕撫我,吾知係咪真係想呵返媽咪呢!如果佢喊緊當一見返媽咪就識笑返,有時會聽到佢一路喊一路叫媽咪,吾知佢係咪真係叫緊我呢,其實聽到佢喊住叫媽咪真係會好冧架!(變態媽媽又上身)

龍BB越黎越鍾意講野,有時重好似同你對話好攪笑!又鍾意尖叫高呼,係高8度個隻!
食一日5餐,其中1餐粥,4餐奶!好彩龍BB由出世到而家食奶食糊食粥都好合作,快快食完吾浪費!
而家已經食過菜類: 南瓜,菜心,小棠菜,番茄,薯仔,紅蘿蔔,粟米,冬瓜,青豆,青瓜,蛋黃,三文魚,豬肉,雞肉,香蕉,蘋果,雪梨,啤梨,士多啤梨,提子,西瓜!
本來最夜個餐係11:00pm,但依個月已經調節返早d變成最夜10:00pm! 7:30~11:30~15:00~18:30~22:00便便一日一次,有時見佢無便便會同佢'吾',跟住佢又會運功'吾吾'下就有,好叻叻!
如果食左香蕉就吾洗點用力都好快會有便便!睡覺一日訓到10hrs以上,每餐之間要小睡1hrs以上!
不過夜晚都要醒兩至三次,有時要抱抱,有時拍拍背先訓!訓前要食奶咀抱5-10mins先肯訓(幾時先吾洗咁呀......)發展鍾意人唱歌,特別係Rainbow,佢會同我一齊唱,好攪笑!
成日反身扒係度想爬,但仍然未識向前爬,只會向後同打側爬!有時會扒係度做撑上壓,扒得耐會大叫求救!
鍾意人同佢玩give me five,識伸手出黎一拍落去手手度就笑晒!
間中識揮手Bye Bye & Hello!
龍BB知咩叫kiss kiss,我叫佢kiss 媽咪會識kiss落我塊面度,不過次次都會濕晒!
叫佢比比,佢會更加捉實吾比,Haaa!
同佢玩點蟲蟲,佢有時會用手指點,不過係幾隻手指一齊點!超鍾意企,識自已扶住野企得好穩!放佢落BB床開始會扶住側邊嘗試企起身,30次有2次識自己企起身!


6M15D~ 我個眼神係咪好迷人呀.....

6M20D~ 做咩表哥攝入鏡既!

6M23D~ 媽咪話我將來會事業有成喎!!



6M26D~ 我要努力學自己企企!

6M29D~ 我係咪同件衫一樣咁可愛呢?!

 

Duck 左 + Gap 放血

7M3D
正值前日星期六(6月1日)係龍BB 7個月大,我同老公決定同龍BB出去尖咀影DUCK DUCK順便行下Gap(經fd口中知道BB衫做折)!
DUCK DUCK就快離開HK,所以點都要比龍BB同佢影返張合照先DUCK!

有得出街龍BB成個大少咁款,浪起對腳勁爽!



2點幾去到碼頭,我一見到巨DUCK心情都幾興奮,不過眼見人頭湧湧,我地又推住BB車,其實都幾擔心點攝埋去同佢合照,不過首先當然係要係眾所周知影DUCK既有利位置影張高抄全DUCK相啦,原來吾止地下多人,連停車場都好多人又係要搵位攝!

天朗氣清+維港景色,再加埋可愛DUCK DUCK簡直一流,靚!

去返地下,終於攝到位影全家福!
DUCK左,可惜龍BB訓著左!

影完相那那臨走人,因為真係太多人同熱喇!跟住我地先搵育嬰室比龍BB食飽飽後再輪到我同老公去食野,然後再去Gap掃貨!
去到Gap又係人頭湧湧,BB衫3件85折,5件75折,8件65折,最後掃左11件比龍BB,Total只係HKD$9XX!龍BB成功幫Daddy媽咪放血喇!
不過我覺得佢D Size偏細,所以買左18~24mths,念住下年龍BB 18mths先著,褸&棉褲就今年年尾著,點之買完返到屋企試上身先發覺短袖衫只係闊少少&長少少,其實今年已經可以著,polo就睇落大件d可以留下年著,褲就今年可以著!
其實龍BB而家都只係7mths大,點解可以著得落架,係龍BB大件定衫太偏細得咁緊要?!老實講我真係吾知點買BB衫,有時吾同牌子D尺寸真係好難估!我本身想去換再D大,但老媽子話吾怕,洗左會縮少少,今年著大少少,下年著就剛剛好!都係老媽子既說話有說服力,最後我都係無換Size既!
Discount做到5號,要買就快手喇,佢有D Size出面未必放晒出黎,可以問sales姐姐/哥哥,佢會入倉拎比你!


依條針織褲已經買到3yrs,但今年啱著!

幻想龍BB再大D著牛仔褲會好有型!

好鍾意依件褸,即場著上龍BB身勁有型,即買!

背心仔而家已經剛剛好著得喇!

買滿HKD$500送既贈品!龍BB好鍾意個棒球,成日拎住玩!