龍 B 媽之記事簿: 龍 B B 面試篇

顯示具有 龍 B B 面試篇 標籤的文章。顯示所有文章

2015年2月3日星期二

K1 心儀幼稚園 2015

2Y3M3D (2015.2.3)
我依個懶媽懶左一排都係時候要坐定定幫龍BB Updated 下個 Blog 喇! 講返早幾個月為左要幫龍BB 報K1...Interview...等消息都幾緊張, 而家總算塵埃落定有間心儀學校收左龍BB, 講真, 一知道消息後我真係開心到喊左出黎!

依間學校出左名學術好, 老師好, 要家長身教, 教出來的學生好守規舉! 其實一例開心, 二例我都有少少壓力, 希望鍾意自由既龍BB 到時真係應付到啦!

由於係誇區, 所以要坐校車, 亦因為要坐校車所以我同老公提出不如我自己揸車接送重方便, 本來生龍BB 之前老公一直都有揸5人座位車, 反而生左龍BB 就無用車了! 但係而家又覺得龍BB 開始大可以有車方便同佢周圍去玩, 不過我地由上年睇7人車到而家都未有心水二手車出現(老公要求好高=.=), 所以一直拖到而家都買吾到, 希望今年9月前遇到Dream Car 啦, 不過我依個十年牌仔都已經生秀, 到時真係要操一操!

2014年12月2日星期二

K1 Interview 2014

2Y1M2D
11月K1 Interview終於完成晒, 雖然而家間PN 可以原校上K1, 但我都想試下幾間區外幼稚園! 我一共報左8間, 全部無撞期, 但係我已有１間放棄左(另外有一間要等到12月中 9:00am先in, 希望到12月會有其他offer 啦!)

2Y (2014.11.01) 比華利 10:15am
依間上年PN in過, 其實K1 都預左吾得, 因為佢大部份學位留比PN 直升! 當日in 完即刻要back list 間幼稚園, 話說一班有6-7個小朋友同一課室in, 但只得5個老師, 當時一個老師睇住龍BB 同另一個大B 女仔, 個老師竟然可以完全當龍BB 透明, 而龍BB 就自己一個玩玩具(最嬲係個老師重要講左句, 你自己玩住先啦), 之後全程只係陪住個女仔玩玩具問問題, 無奈我只可以坐係遠處旁邊觀察, 最後in 完即走, 我對依間無期望相反對老師有失望, 人手不足, 老師好敷衍了事! 走個陣龍BB 係門口見到部Bubbles 機超開心, 玩一輪先肯走!

2Y8D (2014.11.08) 九龍靈糧堂 11:00am
我覺得依間龍BB 表現OK, 算係做晒指令同肯答問題(對於平時少講野既龍BB 黎講, 我已經覺得好好了)!
老公同我陪龍BB入去課室, 龍BB 見到張櫈好自覺咁拉開自己坐, 我同老公就一左一右坐龍BB 隔離!
老師: 你叫咩名?
龍BB: (念左一陣) 逸軒
老師: 你同邊個黎?
龍BB: (望住我) 媽咪, (望住老公) Daddy
老師拎本書指住蘋果問係咩?
龍BB: Apple
老師拎個碗,叉出黎問係咩?
龍BB: Bowl......之後吾出聲
老師叫龍BB 將支叉放入個碗
龍BB: 做到指令
老師拎架紅色車出黎問係咩同顏色?
龍BB: 吾出聲 (平時都肯講 =.=)
當日表現令我有DD意外同開心, 因為龍BB 肯比下反應老師, 無扭計全程好有耐性!

2Y15D (2014.11.15) 宣道 10:00am & 培道 2:30pm
同一日in 兩間, 好彩時間配合可以走兩場! 朝早in 個間係屋企附近, 佢係區內口俾吾錯, 亦係一間勁難入既幼稚園! in 之前先安排遊戲室比小朋友玩, 不過我無比龍BB入去玩, 驚佢會玩到吾願走, 等左無十分鐘就由我陪龍BB 入課室, 入面重有另一個老師in 緊人! 一開始老師比龍BB玩積木, 一路玩一路問問題, 可惜龍BB 完全吾理人!
老師: 你叫咩名？
龍BB: 吾出聲掛住玩積木
老師: 今日同邊個黎?
龍BB: 望一望我後吾出聲, 再擰去門口望住Daddy望左好耐 (老公企係門口等, 比龍BB 見到)
之後全程分晒心, 有問無答......心知不妙！個結果相信都係Fail 居多! 之後我地比龍BB 去返遊戲室玩一陣重有時間去食個飯先再出去in 培道!

大約2:15am 去到, 當日勁多人迫爆個操場, 先排隊交文件之後就由我陪龍BB 入去另一個室內操場坐定定等, 當時場內已經勁多家長陪住小朋友坐定定等, 一等就等左好耐, 講真依個安排有Ｄ亂, 小朋友們開始坐吾定失控！等完入去另一個操場分６組比佢地坐地下玩大積木, 又係等左好耐先再排隊行樓梯上兩三層樓, 上到去再係課室門外排隊等入課室, 相信依間幼稚園真係想考下大家既耐性!

入到課室分４個位, 每個位有一個老師, 又係例牌問幾條問題！
老師: 你叫咩名?
龍BB 好細聲答: 逸軒
老師比大至細形狀佢放原位, 龍ＢＢ慢慢遂個遂個放好晒!
老師比積木佢自己疊高, 之後又比３個大至細既碗佢疊好!
In 既過程好順利, 龍ＢＢ完成晒指令! In 完之後我地重走去行左陣街先返屋企!

2Y22D (2014.11.22) 啟思 3:15pm
無去, 因為當日有其他野做

2Y23D (2014.11.23) 創價 1:40pm
我其實好期待去依間幼稚園, 環境同老師比我感覺都好好! 去到等左大約15mins 我地就陪龍BB 入課室, 課室有兩個老師, 一個問我地問題, 一個考龍BB, 當時我掛住答問題都無留意到龍ＢＢ, 不過見老師係觀察龍BB 玩多過考佢! 反而另一個就一路問我地問題就一路比分！
老師: 平時邊個湊？
我: 公公婆婆, 我地一放工就會自己湊返!
老師: 最欣賞佢Ｄ咩？
我: 聽指令, 願意分享......(個刻真係有Ｄ驚自己吾知講緊咩)
老師: 點解選依間幼稚園？
我: 欣賞教學理念......(有Ｄ似背書)
老師: 多謝, 咁下午班考吾考慮？
我: 一定會 (就算得pm offer我都肯, 當然又係勁難入)
事後我睇返ＢＫ原來劉德華都親自同個囡去ｉｎ依間, 嘩～可以同我偶像個囡同一間幼稚園, 真係開心C ^.^
In 完比龍ＢＢ玩左陣, 大堂好似遊樂場咁, 小朋友們玩得好開心！

2Y29D (2014.11.29) 聖羅撒11:00am
依間幼稚園係男女校, 但小學係女校, 雖然龍ＢＢ無得直升小學, 但係我都想比龍BB 試一試!
其實去in 之前好驚會無咩男仔, 但到現場又見有吾少男仔喎!
去到先排隊交表再等叫名, 龍ＢＢ當日好坐吾定, 完全不在狀態! 當叫到龍ＢＢ時有分４個小朋友入同一課室, 一個老師睇龍ＢＢ玩比分, 另一個老師問我地問題比分, 老師吾知有意定無心, 全程多數問我老公問題, 問到佢口啞啞 (叫佢玩問答比賽實死得＝.=)
老師: 平時邊個湊？
老公: 公公婆婆, 我地一放工就會自己湊返!
老師: 爸爸你假日會同佢去邊？
老公: 去公園, 有時去下科學館/博物館!
老師: 媽媽你平時同佢做咩？
我: 係屋企會同佢睇書, 玩玩具, 教佢認吾同事物!
老師: 爸爸點解你選依間幼稚園?
老公: 師資好, 環境好......開始有Ｄ離題＝.=" (滴汗中)
老師: 邊個送佢返學, 坐校車？
我: 我送佢上校車！
問完一大輪再望下旁邊玩緊積木既龍ＢＢ, 原來佢已經將積木疊到勁高, 之後老師叫佢拆返出黎放返入個籃, 龍ＢＢ好合作即做, 中途跌左一個落地重即刻落地拎返入籃!
老師見到就讚佢乖, 重問我地佢係咪好文靜 (原來龍ＢＢ坐係度玩個陣比人感覺係文靜個種, 已經吾止一個咁講)

2Y1M18D (2014.12.18) 九龍塘宣道９:30am
多數吾去, 一例星期四時間難就, 二例１２月中先見預左佢係之前見晒Ｄ大Ｂ先, 三例１２月已知道其他幼稚園結果 , 希望到時會有Offer!
　

2014年1月23日星期四

翠茵小字宙國際幼兒/稚園 PN Interview

1Y2M23D (2014.1.23)
上星期六同龍BB 去左屋企附近間翠茵小字宙國際幼兒/稚園 PN Interview, 今次係龍BB 第三次PN Interview! 第一間(比華利國際幼稚園)吾收細B 無晒聲氣, 我有個FD個大囡讀緊K1都吾肯收佢個細囡(細B)! 第二間(東華三院獅子會幼稚園) Waiting list! 今次第三間收左龍BB 讀PN!

其實翠茵小字宙係我最想入既心水, 而家已經成功入到, 所以之後有其他學校既Interview 都念住吾去了! 最想入依間學校係因為一例佢又近屋企, 二例間學校口睥都幾好, 三例家姐個大囡N咁多年前讀過, 所以又印象分加左!

依間學校有分主流同國際班, 我就報左國際班有外藉老師上堂同會教普通話, 講真PN 我真係吾會期望龍BB 讀到D咩, 不過最起碼佢可以接觸多D有少少認識都會有用!

1Y2M18D (2014.1.18)
當日Interview 時間係10:00am, 我地9:45am 去到先登記, 之後重有時間比龍BB 係學校入面周圍活動Warm up 下, 當時已經有好多小朋友玩緊, 而龍BB 第一時間就走去佢好鍾意既SIR滑梯到玩, 玩到幾乎連叫佢名都吾肯走!

之後幾個小朋友分成兩間房, 房入面有4位外藉老師各自一張枱, 枱上面有幾樣玩具, 龍BB 一坐底老師就問龍BB 叫咩名, 當然龍BB 係吾識答繼續玩佢手上玩具, 之後我就逐一答老師, 跟住佢又問平日邊個湊? 識自己食野未? 平時同龍BB去邊度多? 老師一路問就一路撩龍BB 玩, 又叫佢彈琴比老師聽, 點之龍BB 真係自己彈琴再拍手, 氹都個老師勁開心又讚龍BB Good Job, 之後就叫晒幾個小朋友行去中間圍圈唱歌仔!

到去另一個房又係有幾個老師各自一張枱, 今次老師就用中文問問題(又係個d問題), 老師叫龍BB 入形狀全部入晒, 又用玲玲測試下龍BB 有無反應, 全部做到但可惜龍BB 已經開始坐吾定要走人, 最後老師比返張評分表叫我拎出去登記交留位費, 我見兩位老師評分都好好, 不過我覺得其實個個小朋友都一樣咁評分heee

2013年12月13日星期五

東華三院獅子會幼稚園 PN Interview

1Y1M7D
上星期六龍BB 第二次PN Interview"東華三院獅子會幼稚園"!

當日約左12:45pm, 大概12:25pm 已經去到, 入到去先登記完就入左一間課室同其他小朋友一齊玩玩具, 玩左一陣就要全部小朋友由一位家長陪同入另一間課室, 課室入面已預先有兩排座位, 前一排就比小朋友坐, 後面個排就比家長坐, 可惜龍BB 吾肯自己坐, 要我抱住先肯坐定定! 兩位老師先同大家唱歌 Warm Up 下, 但龍BB 係完全無反應囉! 之後又叫小朋友坐去上堂既座位度玩枱上面D 玩具, 兩位老師就走去同家長傾下計觀察下小朋友, 龍BB 係第一個比老師問問題, 點之問問下龍BB 就開始坐吾定自己周圍走, 又走去隔離枱襯熱鬧, 重要全場6, 7 個小朋友得龍BB 一個走全場, 我就跟住佢行黎行去捉都捉吾住佢, 其他小朋友就乖乖咁坐定定! 之後老師可能吾想我咁監介就同我講, 依度得龍BB 一個識行所以佢周圍走係正常而吾係代表佢曳, 聽完依番話好似真係無咁監介喎......(自我安慰中)

玩完一輪老師就送左一包熊仔餅比每位小朋友, 當然包熊仔餅比我同老公消滅左啦, 因為有朱古力龍BB未食得住(奸笑)!

其實今次依間學校既地點老公吾係咁Like, 因為坐完MTR 都重要行一大段路先到, 所以老公話就算有offer 都吾會考慮!

2013年10月22日星期二

比華利國際幼兒/幼稚園 PN Interview

11M22D
上星期六係龍BB 第一次PN Interview"比華利國際幼兒/幼稚園", 其實龍BB 一歲都未夠可以IN d 咩呢? 講真我都只係當攞下經驗, 因為龍BB 又係細B, 好多幼稚園又講明收大B, 所以我都只係抱住嘗試既心態幫龍BB 報PN!

上網睇過知道依間幼稚園係會將所有PN 大B細B & K1 放晒同一日IN! 當日約左11:45am, 大概11:30am 已經去到, 入到去先登記完就入左一間課室填少少資料跟住就等叫名, 其實當時真係勁多人, 可以用迫爆走廊課室黎形容, 等到差吾多12:10am 先到龍BB!

由一位家長陪同入另一間房, 房入面有四張枱, 每張枱有幾樣玩具同一位老師, 首先老師叫龍BB 自己玩下玩具, 跟住就觀察下佢表現又問龍BB 係邊個湊之後就完, 成個過程都吾洗十分鐘完成......

其實我真係覺得今次似幼稚園Open Day 多過Interview! 有種感覺佢會收大B, IN 細B 都只係循例做下樣, 跟本咩都無做過! 不過老師就有讚過龍BB 坐得定, 聽到音樂有反應, 好笑容 & 衣著著得靚(無念過會讚依樣喎)! IN 完之後老師話可以周圍參觀下間幼稚園&玩遊戲(更加覺得係Open Day 囉)

11M19D~ 著套飲衫醒神晒, 出發時幾得戚 !