Happy New Year 2013

重有幾個鐘就迎接新一年2013年!回顧今年2012年係令我同龍B爸好開心好感恩既一年,因為屋企多左個新成員龍BB!

感恩上天賜左個健健康康既龍BB比我地,而家做左媽媽真係個感覺吾同晒,好滿足同覺得自己真係好幸福!

希望新一年2013年會係更美好更幸福既一年!

龍B爸,龍BB ~~ I LOVE U

我同龍BB祝大家新一年2013新年愉快,願望成真!

1M31D

Merry X'mas 2012

今年既聖誕過得特別有意義,因為我地多左個新成員龍BB!年年我同龍B爸都會同一大班朋友出去慶祝,但因為今年龍BB重太細,所以無得出去要留係屋企照顧佢,不過都好開心有龍BB一齊過聖誕,依個聖誕節過得真係寧捨溫暖!

龍BB,等下年你再大個D先再同你出去威啦!

等我同龍BB係度祝大家Merry X'mas,過一個愉快既聖誕節
1M22D~每一個笑容都好Sweet sweet

龍BB上左兒童雜誌黃巴士

琴日收到Dec 2012 第44期登左龍BB張相既兒童雜誌"黃巴士"一本!
話說11月底有位係兒童雜誌"黃巴士"編輯在我個Blog度留言話覺得龍BB好可愛叫我Send相比佢個Mail話想將龍BB張相登上"黃巴士"雜誌!
佢叫我留底龍BB姓名,出生日期,地址!如果登左龍BB張相後會寄返本雜誌比我留念!
龍BB好叻叻呀,出世吾夠兩個月就比人登左張相上兒童雜誌喇! YEAH~~

依張相龍BB只係啱啱出左世17日

暫別奶媽

由於坐月日日只可以食得個幾樣野,加上開刀又吾可以咁快補身住,所以而家一放監我就好似忘記左自己啱啱生完BB咁有D係食方面放縱自己!

本身我對蝦,牛,菇係特別敏感,一係吾食,一食就出事喇!上星期五夜晚照餵人奶比龍BB,到第二日發覺龍BB塊面多左好多紅色一達達,之前有走米情況好左D,頭泥退晒,但今次紅色一達達係無走米,當龍BB一哭/谷面紅時.D一達達重好明顯,個樣有D似敏感,我就照用金銀花同佢抺面!直到當晚我突然開始身痕,四支出晒一點點,我之後先醒起原來自己前一晚食左隻大蝦,攪到我勁皮膚敏感出晒點點又勁痕,由於驚自己人奶已傳左比龍BB,所以我已經即時停人奶,全食奶粉!

我睇左醫生食左幾日藥都重未好返,所以暫時都無得做奶媽喇,就算谷奶泵左都要倒左佢吾可以比龍BB飲,真係好浪費!

我真係好內疚,因為自己忍吾到口就攪到要停人奶,而家最希望就係快D好返可以再比返人奶龍BB,希望到時重有人奶啦!

至於奶粉方面,龍BB踏入第二個月時食人奶都有間中補A+奶粉,但依幾日要全奶粉後龍BB有就兩日無便便(飲人奶時一日至少兩次以上),加上放屁勁臭,所以懷疑太熱氣,而家即刻同佢轉美素奶粉,一轉奶粉個餐就有便便喇,真利害!

媽咪你曳曳亂食野,攪到我無得飲媽媽奶,等我伸下條俐仔表示抗議先
1M5D既龍BB

滿月 01 Dec 2012

01 Dec 2012 係龍BB滿月大日子,辛苦左成個月,終於等到佢滿月喇,真係好開心,見到佢一日比一日大隻,個心都有D安慰,不枉我努力埋身餵足佢一個月人奶,佢而家已經10.3磅,比出院時重左3磅喇!不過,由第二個月開始要餵奶粉喇,因為龍BB好大食,開始食4安,人奶亦開始吾夠佢食喇,要谷奶先一邊泵到4安,所以係吾足夠龍BB一日咁多餐既份量,不過我都會盡量有幾多比幾多佢既,希望吾好咁快停人奶!

由於我同龍B爸都一早打算擺百日宴,所以滿月就簡簡單單同兩邊屋企人幫龍BB攪左個大食會慶祝!我在美心訂左個2磅蛋糕,個蛋糕比相像中靚同好食,價錢又合理,重可以用埋美讚臣送既8折coupon!等百日宴再同yin2pastry訂個大D既3D蛋糕!

龍BB...Daddy Mummy祝您快高長大,身體健康,可愛活潑,聰明伶俐,人見人愛

皮膚問題

龍BB今次又比考驗媽媽喇!
最近龍BB皮膚差左好多,塊面同額頭多左好多一達達紅色,近睇原來係白色一粒粒走米! 咁細個就有走米,吾通熱氣,定係同人奶有關呢?
另外額頭同眼眉毛生左D一達達好似頭泥既野(其實都係估估下),因為之前見Blog友個BB都有類似情況,佢有比藥膏BB搽,但龍B爸就反對咁細個比藥龍BB搽,又話初生BB皮膚幼,吾好搽咁多藥,會自然退慢慢好!
唉,但生左成個星期都無退,我開始有D擔心,我應該點做好呢?連係咩都吾知,定係真係會自己退呢?有無媽媽可以幫下我呀?見到龍BB咁真係心痛,陰公豬!

Day 28

Huggies入會禮物(3)

上兩星期收到Huggies寄黎既S碼尿片,濕紙巾,耐洗紙(聲稱可以洗4次),Coupon!其中有一張係可以去換本Baby-mo雜誌,但佢寄黎個張係過晒期拎吾到既!

再過一星期後,Huggies又重寄多份尿片,濕紙巾,耐洗紙,Coupon比我,即前後收左兩次!

今次佢就寄返張無過期既雜誌Coupon比我,不過我都無念住去拎,因為吾順路!

5最高分
禮物吸引:

湊仔煩惱

龍BB已經不知不覺出左世第21 Days,頭一星期都覺得龍BB幾易湊,但係而家我已經投晒降!

食奶:
頭一星期好定時,佢每隔3個鐘就會食一次奶,每餐大概2-3安,埋身餵完奶就會訓! 但由Day 15開始,佢開始有D不定時,有時會訓2個鐘就要食奶,有時就一餐餵完4安奶都未夠重要再食!而家重誇張,可以訓4-5個鐘先要食奶,一食就攪3個鐘(當中有需要換2-3次便便,分開停幾次食奶),唉...好苦腦,龍BB真係好大食,佢個嘴真係無時無刻想搵野食,連奶咀都呃吾到佢!真係吾知佢想點!

便便/尿尿:
同上,由於食得多,又不停時食,食得又急既關係,佢D便便真係多到爆,每餐又鍾意食下停下,攪3個鐘都不突止,重要一食就已經Feel到佢有便便喇!當佢一食完就幫佢換片片啦,點之佢又要食,好啦,再食,又有便便,就係咁一餐可以換幾次片, 攪到人都傻!其實之前已經知道人奶係會有輕瀉作用,但其實龍BB係咪肚痾呢?定係初生BB真係咁會直腸直肚得咁緊要呢?其實我係咪吾應該比佢食咁密/多呢?但佢每次都哭都聲沙又吾忍心!

嘔奶/吐奶/打Egg:
每當龍BB飲完奶就會同佢掃風,但發覺就算同佢掃完,坐一陣後放低佢訓,佢都會吐奶(口經常含奶) or 打Egg, 攪到我真係吾敢放低佢,所以真係好怕餵奶既時候,一餐玩3個鐘,其實第一餐剛完成,第2餐都已經要開始喇....help!!

訓覺:
龍BB好無安全感,吾訓不突止,有時佢明明好眼訓都重要眼仔裝下裝下,好似想睇下有無人走開咁!就算訓著佢個身都會經常陣一陣,有時重會好似發惡夢哭甦,跟住又訓返!一聽到聲佢又會嚇一嚇(好細聲都會),見到佢訓得吾好就等於我都訓得吾好,有時都幾擔心!

Day 18既龍BB

生龍BB過程

30/10/2012(40W5D)
朝早7點幾訓訓下開始Feel到個肚有D痛,不過係好輕微,因為平時間中都會Feel到有D不規律既痛,所以無理佢照訓!但當訓到9點幾就痛甦左,自己就好自覺咁睇時間計時,發覺真係大概20分鐘就會痛一次,但都算輕微忍到既痛!
由於輕微加上無紅無穿水,所以一心念住等下先,因為驚去到醫院食炸糊比人趕返出來!跟住我就打比返緊工既老公叫佢要有心理準備我隨時入院!
直到下午3點幾開始Feel到痛密左,由20分鐘去到10分鐘一次,但都忍到!不過為隱陣起見都係決定沖定涼,等5點坐的士去醫院,老公收6點可以直接放工過黎,醫院探病時間6-8,咁老公又可以陪我耐D!
5點幾到醫院,姑娘叫我留院一日,點之當我去厠所換衫時終於見紅喇,個刻心情好興奮,因為知道自己吾係食炸糊,好快可以見龍BB了!
換好衫駁心跳機,姑娘話陣痛吾算勁,聽左半個鐘,就跟姑娘行上去病房訓床等喇!當時老公已經到左,重同佢有講有笑念食咩好!
8點探病時間完,老公要走真係好吾捨得!直到夜晚10點幾開始Feel到陣痛又密左勁左,5-10分鐘一次,每次大約痛1-2分鐘係有D忍吾到個隻,會突然痛到彎晒腰,發出忍痛聲,捉住床邊條鐵,我同姑娘講,佢幫我Check下幾度,點之一度都無,唯有繼續痛住等!間中姑娘都會過黎同我駁心跳機&Check下開左幾度,但到第二日都一直未有度數!就係咁係越來越痛既情況下等到第二日!

31/10/2012(40W6D)
一直5-10分鐘痛一次,每次Keep住痛1-2分鐘,到醫生中午Check都係未開度數,眼見身邊床位個D媽媽車輪轉咁換人,自己都不禁痛到流眼淚,係咁問醫生可吾可以催生,醫生又話未到41W通常都會等自己開度數,唉,就係咁一直又密又痛既情況下咁等,直到夜晚6點幾老公黎到,我當時真係痛到講吾到食吾到野,一痛就捉住老公隻手,樣都變埋!
當時聽到隔離床個媽媽同醫生既對話,佢遲我一日入黎,痛左一日都有得開刀,於是我就問老公不如問下醫生又吾比催生咁可吾可以開刀呢?!因為真係好痛好密,痛左好耐又一度都無,點等10度呀!
輪到醫生同我檢查,我膽粗粗問佢可否開刀,醫生話原來隔離個媽媽第一胎開過刀所以第二胎可以幫佢開刀喎,唉,我灰晒!
直到夜晚10點幾我依然一度都無,姑娘叫我行走廊,我真係只好用意志去行,一路行一路用手機計時,又痛密左喇,每2-3分鐘一次,每次痛2分鐘,我打比老公,二佬求救(因為二嫂個妹係醫院做,睇下有無咩可以幫手),我D FD就不停同我whatsapp,佢地好擔心我,好奇怪痛咁多日一度都無但又吾可以催生,幫穿水等等問題......
直到零晨12點幾,我同姑娘講頂吾順,佢幫我駁機都係一度都無,但發覺龍BB有D吾夠氧氣,所以我要插鼻輸氧氣比龍BB,到零晨1點,醫生終於將我送去待產室,好開心可以叫老公陪同聞笑氣喇!第一時間Call老公!
一落到待產室(獨立一間房),醫生幫我穿水,因一直痛到去吾到厠所,所以醫生幫我插喉放尿,而穿水只Feel到暖水流出,係無扑一聲!跟住吸笑氣打止痛針再痛住等(完全吾Work),零晨2點,老公入左黎,我同姑娘要求用無痛分勉,姑娘話要等,吾知要等幾耐!我當時開姑Feel到勁急屎,係急到要用力痾個隻,姑娘叫我忍,嘩,個刻真係又要忍屎又要忍痛,真係好慘痛!另外當時唯一希望就係勁吸笑氣,雖然知無咩用,我一隻手捉住老公隻手,一捉佢就比笑氣我聞,當時覺得識左佢咁耐,個刻真係無比既合拍 haaaa!

1/11/2012(41W)
朝早6點幾醫生再Check都只係開左3度,佢幫我打催生針,同時麻醉師到埋可以用無痛分勉喇,佢同我講解負作用之類,我當時咩都聽吾入耳,心念快D啦!老公當時要暫避一下,個刻有個女人禁住我要我側身彎腰,跟住醫生同我講"我而家打喇"但我個時陣痛又黎,所以我叫佢等等,一痛完就話得喇,跟住醫生就在我背隻度打左幾針,我估大約20分鐘打完,打完真係好快吾痛,得返急屎既感覺!
老公入返黎,係無痛情況下再等到中午12點醫生Check都只係開多2度,即前後得5度,醫生話Check到子宮同龍BB頭仔有D腫加上時間太耐,要緊急開刀,1點幾推我入手術室半身麻醉,老公吾比入,我當時好緊張,全身陣晒,左右手被綑綁,麻醉師好好,佢主動比英文歌我聽等我Relax下,我一路心呼吸,Feel到個肚比人推緊!
1點幾生左龍BB喇,醫生比我聽龍BB哭聲,我真係感動到流淚,醫生幫佢檢查清潔後抱過黎比我睇&錫左一啖,我即時哭到D眼淚"爸爸"聲咁流!
由於龍BB出世肺部有少少問題,所以要訓箱一日!

2/11/2012
龍BB可以吾洗訓箱喇!可以抱埋身,就係咁亦都開始左我奶媽生涯喇!4號出院重趕得切我5號生日一齊慶祝,老公,奶奶都已為我訂好蛋糕了!姑娘同我約埋7號上門做家防拆線!服務幾好!

***值得一讚醫院D產房姑娘,雖然佢地好後生,但佢地都好專業好Nice,問咩答咩,重好識得去關心我支持我!反而D後生男/女醫生就好似無姑娘咁專業,伸手入去Check會陰開幾度時,佢地竟然吾肯定,要由姑娘再伸手入去Check多次!最慘係個男醫生吉手吊針時,竟然吉錯位要重吉,玩咩!***
***由於之前聽晒醫院講座,所以有張証書!依張就係龍BB出世後第一張証書喇,係我抱住佢影!***

龍BB 出左世喇

龍BB 2012年11月1日出左世喇,重3.33公斤!由我10月30日至11月1日陣痛左幾日再經歷埋用無痛分勉最後都係要開刀生龍BB,依個經歷真係令我畢生難忘!

而家真係好忙,由11月4日出院到第二日就要返醫院檢查黃疸(合格170),第三日又去健康院磅重驗黃疸(比醫院高左少少,但都合格190),第四日又返去健康院見醫生同龍BB做詳細身體檢查!龍BB一切健康正常,放心晒!

由於而家我重好努力去適應湊龍BB&做奶媽,所以要遲下先再同大家分享生仔過程,比住龍BB近照大家睇住先啦!

Pampers Coupon

琴日經過萬寧見佢做緊75折,加上記起有媽媽話買尿片有尿片送,所以就走入去行個圈順便睇下有咩買!

一直有儲開尿片Coupon既我,其中有一張係Pampers Coupon(買S碼可減$15),由於10月尾到期,所以決定用左佢吾好浪費!

買左一包Pampers特級棉柔S碼62片裝$108.5-$15Coupon=$93.5,再送以下尿片(M碼特級棉柔10片裝一包,L碼超薄乾爽3片裝一包)

美讚臣入會禮物(2)

上兩星期收到美讚臣手襪仔已經覺得幾靚好實用,點之今日再收到隔尿墊重靚!一打開見到隻翠兒好Q呀,下面重有一隔係方便放尿片,濕紙巾等物品,好方便實用!

咁啱我又想買塊靚少少既隔尿墊出街用,而家又可以吾洗買住喇!

5最高分
禮物吸引:

40週 @ 等...等...等

25/10/2012(40W)
今日已經係40週喇,龍BB依然係好愛媽媽個肚吾肯出黎!為左吾想催生,我依幾日開始會食多D涼野谷一谷佢(好似好衰咁)!龍BB....你吾好怪媽媽呀!

而家間中都會肚痛,吾知係咪心理作用,個肚一Feel到痛就會望一望個鐘計時,但係次次痛既時間都吾同,原來又係假陣痛,好無引!其實講真,我真係吾識分點先係初頭既真陣痛,有D人話似M痛(間中都會喎),有D人又話會全個肚"拿"住痛(間中都會"拿"住"拿"住,不過係"拿"一個部位,而吾係全個肚囉)!有時真係好驚吾識分陣痛,傻下傻下咁由得佢而影響龍BB,但係母親大人話一定要見紅穿水先當係,個肚痛下痛下可以不理,等佢見紅穿水先入院喎(係咪架??)!另外有時個肚一痛會連埋陰部都痛,好似針吉咁,會有刺痛既感覺!

依幾日,我同龍B爸身邊D朋友,龍BB契媽,契爺,家人,親戚,同事等個個都好關心龍BB既近況,出世未呀!真係好多謝大家既愛護&關心,攪到佢地好似重緊張過我同龍B爸!

吾知係咪龍BB知道媽咪11月5日生日,所以想同媽咪生日接近D一齊慶祝呢(入院催生11月2日)!?但係我真係吾想係醫院過生日囉!!

龍BB......Daddy媽咪已經預備好一切去迎接您既來臨喇,好多人都等緊&期待您出世呀,出到黎大把哥哥姐姐,Uncle,Auntie陪您玩,包您開心過係媽咪個肚度,您快D乖乖自己出黎啦!錫晒您!

醫院約催生

22/10/2012(39W4D)
今日返左醫院產檢,第一次駁機Check半個鐘胎動&心跳,之後再同我按下個肚&度下Size,一切正常!

由於接近40週,所以E生同我約埋下次入院催生日期,但係一等就要等到11月2號,即41週1日先入院催生,其實我真係吾想拖到11月囉,問個E生可吾可以早幾日入院,但佢話通常都要等到42週先會同人催生&加上催生有一定風險可能會影響到BB,所以寧願BB自己出黎!跟住E生重建議我下星期一(40週4日)再返去醫院再檢查多次喎,唉...心念,咁不如直接入院催生啦!但醫生死都吾肯,係要等到11月2號(41週1日),無計!

我見好多媽媽大約會在40週就催生,但係點解我重要等到41W1D呀......好心急呀!!!