頭暈 & B型鏈球菌檢查

28/9/2012(36W1D)
懷孕後期一直都在健康院做產檢,本來就吾需要再返聯合,但因為前兩日在健康院做定期產檢時龍B媽同左E生講由32W開始經常頭暈,重要係天旋地轉個隻,會吾會有咩事?有無影響BB?洗吾洗食藥等問題!問完一大輪,E生話係耳水不平行,無藥食!

老實講,龍B媽真係好R頭,無那那耳水不平行,又無成因,又無藥食,咁即係點呀,由得暈足一日呀???經龍B媽再三詢問E生後,佢先再安排龍B媽今日去聯合詳細檢查!

今日11:00am去到聯合,人爆多,可能因為之後幾日假期,所以儲埋晒!龍B媽心念肯定有排等!當做完指定動作3步曲"驗尿,量血壓,磅重",大概等左一個鐘就見E生(比想橡中快)!

由於今日已經有36W1D,所以E生同龍B媽做埋B鏈檢查!檢查完B鏈後就入返正題,經常頭暈點解決?E生話原來龍B媽一直都係血壓偏低,所以都話係耳水不平行(下....做咁多次產檢都話血壓正常,而家先話偏低???)!最後E生就開左D藥比龍B媽,要再隔兩星期先返去產檢喇!

Kinetics"母乳餵哺及幼兒疾病預防"免費講座

21/9/2012(35W1D)
今次參加Kinetics"母乳餵哺及幼兒疾病預防"免費講座,相信係最難抽到&聽咁多個講座之中最好!之前已經聽過好多媽媽都話好難抽到,有D試過幾次都無份呀,所以今次龍B媽就用埋龍B爸個資料一齊抽!果然,一向無抽奬命既龍B媽真係抽吾到,龍B爸反而抽到!

今次講座分兩Part,第一Part係大力Sell Join 打針Plan,介紹下D預防針既用處!第二Part就教下大家餵哺技巧等,依個講師真係好生鬼,所以絕無悶場,其中佢講左一D關於坐月事項,生完後吾好飲水,要飲"代茶",如果吾飲"代茶"可以飲"可華田"(佢話係佢呀媽教,但真係未聽過)!

至於禮物方面,佢好似集合左幾間奶粉公司講座既禮物,都幾豐富架！
雅培講座送既"Huggies 0碼尿片"(已經有8包)
美讚臣講座送既"毛巾(已經有3條),袋(已經有4個),飛行棋"(已經有3盒)
雀巢講座送既"Mustela"(已經有5 Set)

5最高分
內容吸引:
禮物吸引:

第六次私家產檢(35W2D)

22/9/2012(35W2D)
第六次私家產檢!今次係第一次龍B爸吾得閒陪我做私家產檢,好彩吾係等太耐,一去到等左20分鐘就可以見E生喇!

今日產檢龍B媽將依幾星期某D毛病講比E生知!
問:訓醒見頭暈 ~~ 答:可能訓覺時比BB壓住條血管,血液吾流暢,所以會頭暈,如見頭暈最好坐起身等佢血液循環!
問:肚痾 ~~ 答:可能你腸胃比較敏感,最好少食多餐,減少食煎炒肥油既食物,對BB應該問題不大!
問:個肚好重,有時宮縮好勁會痛 ~~ 答:正常!

同樣今次又係叫E生照龍BB個樣比龍B媽睇,因為上次龍BB用手擋住個樣照得吾清楚!E生亦都好好人,先照晒其他部位,頭,肚,腳全部符合35W,胎水,心臟亦正常!而家龍BB已經重5.28 lbs喇,好開心呀,因為之前龍B媽日食夜食,個肚又重驚會生巨B,不過E生話一切符合週數所以應該吾會,但E生又無講出世時大概幾重喎!

照完一切正常後,終於到最緊張環節,就係照龍BB個樣,點之......龍BB都係寧轉左面!E生見龍B媽求望龍BB樣心切,E生竟然好人到為求照到龍BB個樣攪左成15分鐘,E生左禁右禁,又係咁同龍BB講野,叫佢乖D啦!最攪笑係E生一大力禁,龍BB就張大個口,好似係度叫痛(講左龍B媽心底話,因為真係幾痛)!玩左一輪,最後都好辛苦咁影左幾張3D,但E生話龍BB又有臍帶圍頸一圈,所以有幾張影得吾清楚,最後只比左一張叫做清楚D既樣比龍B媽睇(但其實都好吾清楚)!

龍BB呀,龍BB呀......點解又玩臍帶呀?!你要乖呀,而家玩完就算喇,出世個陣吾好再玩喇,吾好要Daddy,媽咪擔心呀!

體重:61KGS(134.2LBS)
肚圍:39"

Huggies學習褲

早排收到Huggies個SMS話佢既M碼學習褲做緊特價,於是龍B媽&龍B爸就搵日走落惠康望下喇,發現真係好鬼低,佢賣一包M碼48片都只係$75,好似重平過藥房,如買滿$150再送一支大支裝既黑人牙膏!

但由於龍BB有排都未用到既關係,龍B媽真係念左一陣,因為咁快買都係得個擺!同時,龍B爸就發揮佢既師奶精神係咁叫龍B媽買,又話既然屋企有位加上平咪買定先囉!就係咁買左兩包返屋企擺喇!一包係普通版,另一包係限量版"巴斯光年"

前兩日再行惠康,見Huggies已經無做$75特價喇,反而就賣緊$2xx(2包)......龍B媽又可以同龍BB省$$喇!

清胎毒(腐竹蛋糖水)

20/9/2012(35W)
琴晚返左娘家食飯,多謝父親大人為我而設既腐竹蛋糖水清胎毒,好味道!

可能太耐無食喇,龍B媽重食左兩碗Tim~~

35W的身體狀況

20/9/2012(35W)
由31W開始到而家35W已經覺得身體越來越多毛病,加上個肚又越Bum越大,有時真係有D吃力!

1)頭暈 ~~ 有時一訓甦張開眼就會頭暈,直頭係天旋地轉個隻,要坐一坐起身先好D,但係一訓底又暈過!

2)手腫 ~~ 雙手腫晒,特別係右手,D手指脹晒,一曲D手指就好痛好緊,比起之前31W時既痛嚴重左!

3)肚痾 ~~ 可能龍BB越來越大既關係,好似將個胃頂到上心口咁,食少少野又特別敏感,好易攪肚跟住肚痾(但其實食既野係31W之前都經常食吾會咁敏感)試過一日痾兩次+反胃嘔反D食物出黎!

4)肚脹 ~~ 個肚由31W開始好似突然Bum大左好多,肚臍突左!之前有時係街見到D人個肚好大,重會心念點解我個肚咁細既,到而家終於都感受到喇(肚圍40")!隨著個肚一日比一日咁大,就一日比一日重,有時重覺得會重到痛,加上子宮收縮&龍BB既拳打腳踢......真係"唉"

5)濕疹 ~~ 本身有濕疹既龍B媽,陀龍BB頭4個月真係全身痕到呀媽都吾認得,但5個月後又開始自己好返喎,實在太好喇,因為濕疹一痕真係好辛苦,又吾可以亂搽藥(市面上有好多含有抗生素),E生開個D又無咩用!不過吾好開心得咁早住,濕疹好返幾個月後而家又黎過,33W開始背部,頸,手又有喇(重比龍B媽R損晒)!可能濕疹係時候提醒龍B媽開始要勤力D清胎毒喇!

6)肚痕 ~~ 一直都無肚痕&妊娠紋問題既龍B媽,34W開始覺得個肚多左D紅色點點,重會有D痕,有時真係會不自覺R下!

7)坐骨神經 ~~ 體重不斷增加,連坐骨神經都特別痛,有時真係好似見拍戲個D人咁,要搵雙手按住再慢慢坐落去先得,真係企又吾係坐又吾係!

8)行動緩慢 ~~ 個肚重左大左,連行步路都慢埋,龍B媽記得陀龍BB 7個幾月時重健步如飛,估吾到相隔一個月就變到好似婆婆咁行得勁慢,龍B媽D朋友重話佢地當年陀BB 9個月都重健步如飛,但點解龍B媽而家會咁架!

9)打Egg Egg ~~ 龍BB打Egg Egg密左,每日至少一次,有時重會一日幾次,其實點解會咁呢?係咪龍B媽食大左,攪到龍BB咁呢?

以上身體轉變,吾知係咪好多媽媽都會遇過?又係咪正常呢?

龍BB胎動(3)

19/9/2012(34W6D)
龍BB近依個月踢得好勁好大力呀,有時重會Feel到係吾知手骨定腳骨頂左出黎,都勁痛下!其實有好多好激既鏡頭已經比龍B媽錄底左,等龍BB大個時比返佢睇下!

每一晚龍B爸都會臨訓前同龍BB傾下計,龍B爸會伏係龍B媽個肚度,當龍B爸一講野叫龍BB比反應時,龍BB真係好似認得把聲咁,一腳就踢落龍B爸塊面度好攪笑,但係龍BB一踢其實係難為緊龍B媽...,不過吾緊要啦,有時見佢兩父子玩得咁開心,龍B媽真係由心笑左出黎!

龍BB加油呀,重有大概一個月就可以見面喇,因為而家媽咪個肚空間有限,比吾到你大展拳腳,等下個月出世時大把空間比你任玩,而家要乖少少,吾好踢到媽咪咁痛呀,叻叻!

亨氐入會禮物

今日收到亨氐入會禮物,相信依份係最耐&最遲先收到既入會禮物,印象中好似係5月申請,而家9月先收到!

睇左好耐份禮物都吾知係咩,有其他媽媽話係食物夾,但到而家都重未研究到點用喎!

5最高分
禮物吸引:

聯合講座

15/9/2012(34W2D)
終於聽完聯合所有講座,佢分9堂,逢星期六循環方式進行,但吾一定每個星期六都有,所以要睇住佢個時間表邊日有咩堂,如果咁啱個日吾得閒,就要再延遲下一堂!

其實聽晒D講座除左可以增加生產知識外,重有一個目的,就係當入院生龍BB時比張覆診卡佢証明係懷孕期內聽晒9堂講座就會比返張有龍BB相既証書!

**產後護理**

**嬰/幼兒培育**

**嬰兒護理**

**母乳哺飼(1)**

**母乳哺飼(2)**

**產前護理,骨盤底肌運動**

**加+加點愛**

**生產過程**

**透視寶寶心"

 

龍BB英文名

14/9/2012(34W1D)
改龍BB英文名依個責任不嬲都已經落左龍B媽身上,只要龍B媽一念到龍BB英文名就問龍B爸鍾吾鍾意,不過之前念左幾個都比龍B爸Reject左!

本來龍B媽係想龍BB英文名用"R"字頭,因為想跟返龍B爸都係"R"字頭英文名,但係我地念左好耐都無心水!不過之後念到一個係龍B爸都幾滿意既英文名就係"Louis"......意思係戰場上英勇戰士!龍B媽同龍B爸好想龍BB將來做一個勇敢,有正義正氣,心地善良既人(好似龍B爸咁)!

但因為有一次龍B爸講左一句玩笑就令龍B媽打消用'Louis"既念頭喇!事緣有次龍B爸伏左係龍B媽個肚度同龍BB傾計,點之佢傾傾下講左一句"Lu Lu"......龍B爸竟然講笑話龍BB係"Lu Lu,龍B媽即係吾開心,當然龍B爸知衰逗返我笑啦!但就係因為咁,龍B媽又要另外念多個喇,因為龍B媽驚第時D同學仔真係會叫"Lu Lu",咁就不得了喇!

直到有日同龍B爸講開,不如用"A"字頭既英文名啦,因為"A"係"A--Z"當中排第一,加上又真係念左好多個都吾啱心水,所以就用"A"字頭開始入手念喇!傾傾下,突然龍B媽腦海浮現左個名"Avis",雖然之後Check返個名係無特別意思,但係吾知點解龍B媽同龍B爸都幾鍾意,一例覺得順耳好聽,二例無朋友改,可以吾洗同人撞!至於中文名打算會搵人改(下次篇Blog再詳細講)!

就係咁幫龍BB改左個英文名叫......"Avis"!龍BB,希望你會鍾意Daddy媽咪幫你改既英文名啦!

I LOVE U:Avis...龍BB...Avis...龍BB...Avis...龍BB

洗龍BB衫

12/9/2012(33W6D)
快34週喇,趁今日陽光普照又係時候洗下龍BB既衫!

其實龍B媽一直都好少買龍BB既衫仔,因為經常聽到人話BB衫吾洗買太多,BB大得好快,D衫好快會吾啱!加上有朋友/家姐轉贈左好多BB二手&新衫,所以而家都吾敢買太多,只係買左幾件!

之前已經洗過一次朋友/家姐轉贈既二手BB衫!而今日洗個D就係朋友/家姐送贈既新衫,本來都吾想洗新衫,但龍B爸話洗埋D新衫會安心D!

總結:龍BB衫洗好,各用品預備好,等下次再洗埋龍BB既床上套裝咁就大功告成!

一切準備就緒迎接龍BB既來臨~~

雀巢"孕婦及嬰兒營養,初生寶寶常見問題及育嬰示範"免費講座

10/9/2012(33W4D)
今次係第二次聽雀巢講座,主題係"孕婦及嬰兒營養,初生寶寶常見問題及育嬰示範"免費講座!

由於今次主題同上次吾同左,而且個主題又符合最近經常易肚瀉既龍B媽,所以就去聽下喇!

其實最近龍B媽有少少放縱自己,食過薯片&雪糕,加上吾知係咪龍BB頂住個胃關係,攪到腸胃吾好,易攪肚!

為左龍BB健康著想,龍B媽決定再次介口,要食返多D有營養既食物先得!

至於今次講座全程係由一個講師負責主講,內容講解媽媽&BB要注意食咩食物會較有營養,最後再教大家點幫BB沖奶粉&沖涼!不過最奇怪係個講師好似有D新手,當示範幫BB沖涼時有D混亂,步驟亦Miss左好多(相比之前D講座),過程中附近有好多準父母不停批評,攪到個場面有D怪!

而禮物方面就正常返喇,因為上次講座既禮物係少左尿片,棉,女性潔膚!

5最高分
內容吸引:
禮物吸引: