13個月 01 Dec 2013

 1Y1M13D
又停打 Blog 半個月喇, 最近真係好忙, 忙到連水豆針都吾記得要去打, 我真係大檬! 另外又要快D Update 返龍BB 13個月成長, 如果吾係又會好快吾記得!

自從過左1歲既龍BB 真係越大越精, 加上佢又可以自己行得好快, 又越黎越好動, 攪到我有時真係頭都大埋, 捉都捉佢吾住! 而家大人講咩佢都識聽明白, 又成日學大人講野, 依依呀呀好攪笑! 一方面覺得龍BB 頑皮左好多,另一方面又會覺得好玩左好多! 龍BB 學習能力都算幾快, 攪到成日會有好多令你意想不到既驚喜同會製造好多笑料! 見到龍BB 每日既轉變, 每日既驚喜, 令到我依個媽媽真係心都甜埋!

 食
已經出左10隻牙仔(上6隻下4隻), 下面左右兩邊大牙亦有白點出緊牙仔! 講真, 我覺得龍BB 出牙真係出得好快, 不過我重未買牙刷幫佢刷牙, 吾知大家有無用緊360度牙刷呢, 我想試下!
大食既龍BB 一日4餐, 2奶2飯, 奶飲7安一餐(早, 訓前), 有時要飲8安先夠, 飯食到一大碗, 每餐之間又要食下水果, 麵包! 見親大人食野時佢又要食埋一份, 真係好餵食呀! 由於龍BB 好鍾意食野, 而家又肥返少少喇, 之前塊面珠 dum 又出返黎喇!
而家已經食過: 西蘭花, 南瓜, 菜心, 生菜, 小棠菜, 番茄, 薯仔, 紅蘿蔔, 粟米, 冬瓜, 手掌瓜, 紅菜頭, 青豆, 青瓜, 雞蛋, 豆腐, 干搖柱(超鍾意食,識食好野), 三文魚, 豬肉, 鯇魚, 雞肉, 麵包(大愛), ABC通粉, 烏冬, 乳酪, 牛油!
香蕉, 蘋果, 雪梨, 啤梨, 士多啤梨, 提子, 西瓜, 橙, 木瓜, 奇異果, 雪梨, 車厘子, 藍苺(吾鍾意食, 會吐返出黎)!
時間係 8:30~13:00~17:30~21:30

訓
朝早11:00會訓到13:00先起身食飯! 玩到15:30又要訓到17:30再起身食飯, 日日如是真係好識享受!
己經同龍BB 訓大人床喇! 不過超吾鍾意蓋被既龍BB 成日會踢走晒我地D 被, 攪到成日要半夜起身同佢蓋被, 不過好快又比佢踢走!

便便
一日一至兩次, 好暢順!

發展
食講好多字, 例如: BABA, MAMA, 婆, 公, 街街, MO(會打開隻手表示物件無左), 波波, 花,     Add婆(apple)! 英文字母都會跟到我講到幾個發音!
屋企有養魚, 問龍BB Fish 係邊, 佢會走過去指住!
比D 拉圾(例如紙巾盒)叫佢扔入拉圾筒, 龍BB 會好開心咁拎住紙巾盒行入廚房扔落拉圾筒, 我地一拍手讚佢叻, 佢又會好開心咁自己拍手行返出黎! 哈哈!
教龍BB 水果名, 佢已經知道邊個係Banana, Apple, Orange!

1Y5D~ 我真係好鍾意龍BB 含情脈脈既樣!   


1Y11D~ 龍BB 依張有D 似女仔呀!
 

 1Y17D~ 龍BB 好鍾意自己梳頭!


1Y17D~ 龍BB 見到個米奇波波吊飾起勢大叫波波, 忍吾住手要摸下佢!

 1Y24D~ 一路睇迪士尼一路比反應, 睇得好投入!


1Y24D~ 龍BB 比個靚EE 抱住同隔離個 2歲姐姐影相!