自從龍BB 返左K1 之後已經好耐無Update 佢既近況喇, 我要再勤力D 補返寫Blog 先得! 今次係好想講下龍BB 返左K1 之後既轉變!
龍BB 第一次著新學校校服即時大個仔左! 我開頭都好驚佢吾肯著新學校既校服, 不過好彩佢又無按扭計肯乖乖做埋Model 影相!
學校初開學有2日新生適應日, 第一日由Daddy 陪坐校車返學上堂, 見龍BB 第一次返學坐校車都算合作, 重識主動上車, 同佢講Bye Bye 重只係掛住望住架校車都吾望我喇!
到第二日由我陪坐校車返學上堂, 由返學到放學全程勁興奮, 放學重好開心係校車不停唱歌講野, 連其他媽咪都覺得佢攪笑~
到第三日要自己上校車返學無人陪, 雖然Bye Bye 時好依依不捨, 但都算乖肯坐定定無喊無扭!
之前返PN 吾洗坐校車, 而家K1 要自己乖乖坐校車接近45mins 車程, 無炸型我已經覺得好安慰!
再講下學校要求方面, 學校對小朋友自理能力幾嚴謹, 雖然龍BB 某程度上都有自理能力,例如已經介左片識自己去兒童洗手間等等, 但其實重有好多自理方面都會係學校學到, 例如係完全無輔助情況下要識: 1)去完洗手間要自己攝返好件衫入褲內, 2)要自己扣扭解扭著衫除衫, 3)上體操堂要自己著鞋除鞋, 4)主動係書包內拎書/功課比老師, 試過有一次聽老師講龍BB 無主動拎回條比老師, 張回條真係幾日放在書包都無人理架! 不過雖然學校學到自理, 但老師意見話龍BB 重未咁主動做晒指令, 可能有時要提2次先會做, 又舉左幾個例子, 又叫我多D訓練佢, 又話會影響評估乜乜乜乜, 其實聽完我都覺得有壓力架, 不過無辦法, 因為老師要求高咁我唯有加把勁訓練龍BB 啦......
至於功課方面一星期有6~7樣! 中、英、數、聖經、閱讀報告、工作紙樣樣齊, 教龍BB 做功課時真係少D心血都吾得!
另外K1 已經要學生認好多字, 老師又經常叫我多D同龍BB 溫書, 攪到而家一聽到老師電話都有D怕怕! 牆上只係部份字, 我估好快會貼滿成幅牆喇 >.<
雖然暫時只短短返左3個月學, so far 都知道龍BB 返學開心同鍾意返學, 次次問佢學校教D咩佢都講到少少, 但可惜記人名方面可能遺傳左我記性一樣咁差, 到而家都未講得出同學仔名!
我都知而家香港讀書教育係辛苦架喇, 龍BB 要加油呀, 媽咪會同你一齊加油架!
