龍 B 媽之記事簿: 1月 2014

2014年1月23日星期四

翠茵小字宙國際幼兒/稚園 PN Interview

1Y2M23D (2014.1.23)
上星期六同龍BB 去左屋企附近間翠茵小字宙國際幼兒/稚園 PN Interview, 今次係龍BB 第三次PN Interview! 第一間(比華利國際幼稚園)吾收細B 無晒聲氣, 我有個FD個大囡讀緊K1都吾肯收佢個細囡(細B)! 第二間(東華三院獅子會幼稚園) Waiting list! 今次第三間收左龍BB 讀PN!

其實翠茵小字宙係我最想入既心水, 而家已經成功入到, 所以之後有其他學校既Interview 都念住吾去了! 最想入依間學校係因為一例佢又近屋企, 二例間學校口睥都幾好, 三例家姐個大囡N咁多年前讀過, 所以又印象分加左!

依間學校有分主流同國際班, 我就報左國際班有外藉老師上堂同會教普通話, 講真PN 我真係吾會期望龍BB 讀到D咩, 不過最起碼佢可以接觸多D有少少認識都會有用!

1Y2M18D (2014.1.18)
當日Interview 時間係10:00am, 我地9:45am 去到先登記, 之後重有時間比龍BB 係學校入面周圍活動Warm up 下, 當時已經有好多小朋友玩緊, 而龍BB 第一時間就走去佢好鍾意既SIR滑梯到玩, 玩到幾乎連叫佢名都吾肯走!

之後幾個小朋友分成兩間房, 房入面有4位外藉老師各自一張枱, 枱上面有幾樣玩具, 龍BB 一坐底老師就問龍BB 叫咩名, 當然龍BB 係吾識答繼續玩佢手上玩具, 之後我就逐一答老師, 跟住佢又問平日邊個湊? 識自己食野未? 平時同龍BB去邊度多? 老師一路問就一路撩龍BB 玩, 又叫佢彈琴比老師聽, 點之龍BB 真係自己彈琴再拍手, 氹都個老師勁開心又讚龍BB Good Job, 之後就叫晒幾個小朋友行去中間圍圈唱歌仔!

到去另一個房又係有幾個老師各自一張枱, 今次老師就用中文問問題(又係個d問題), 老師叫龍BB 入形狀全部入晒, 又用玲玲測試下龍BB 有無反應, 全部做到但可惜龍BB 已經開始坐吾定要走人, 最後老師比返張評分表叫我拎出去登記交留位費, 我見兩位老師評分都好好, 不過我覺得其實個個小朋友都一樣咁評分heee

2014年1月21日星期二

14 個月 01 Jan 2014

1Y2M21D (2014.1.21)
回顧返龍BB 13~14個月成長, 依個月龍BB 又有好多驚喜比我! 首先講下佢D 曳野先! 係屋企勁活躍既龍BB 成日鍾意擒高擒底, 間中擒上梳化都算啦, 佢而家重要擒完梳化再擒枱, 重要高難度咁企係張枱度UN, 當我想捉返佢落黎個陣佢重要覺得好好玩, 同我好似麻鷹捉雞腳咁行黎行去避開我, 一D都吾驚會咁高跌落黎!

龍BB 成日想跟大人入廚房厠所, 一吾比佢入又會lur地大叫, 我一見佢lur地我通常會吾理佢由得佢自己喊, 不過有時佢見無人理佢又會扮無野咁去搵返我! 有時見龍BB 曳我會鬧佢, 但係佢又好似當我同佢玩咁都無咩用, 開始會有D擔心佢係咪吾驚Daddy Mummy既呢??

講完龍BB 曳野, 其實佢都有乖既一面! 我覺得龍BB 好懂事, 有時佢表哥(5歲)搶龍BB D玩具時, 表哥一比大人鬧就會大喊, 龍BB 反而會好冷靜咁拎張紙巾去幫表哥抺眼淚, 又會將手上玩具Share返比表哥玩, 我覺得依樣龍BB 真係好值得讚! 吾知第時如果有個細佬/細妹, 龍BB 係咪會係一個好哥哥呢!

自從龍BB 識自已去扔垃圾後, 試過有次見佢拎住張用過既紙巾走去扔落拉圾筒之後好開心咁拍手, 原來個張紙巾係我抺完野吾記得扔, 龍BB 好自動波咁幫我扔埋, 哈哈!

龍BB 觀察力好強記性好好, 佢飲完個水杯會自己放返上枱, 重會推入D個杯驚佢會跌(依個係我既習慣, 比龍BB 模仿左)! 有時我念住幫佢推入D個杯, 點之龍BB 會吾制, 佢要自己完成晒成套動作先得, 跟住又會自己拎返個杯再放多次上枱!

食
已經出左16隻牙仔(上8隻下8隻,連大牙都出埋)!
龍BB 一日4餐, 2奶2飯, 奶飲8安一餐(早, 訓前), 飯食到一碗, 每餐之間又要食下水果, 麵包!
而家已經食過: 西蘭花, 南瓜, 菜心, 生菜, 小棠菜, 番茄, 薯仔, 紅蘿蔔, 粟米, 冬瓜, 手掌瓜, 紅菜頭, 青豆, 青瓜, 雞蛋, 豆腐, 干搖柱(超鍾意食,識食好野), 三文魚, 豬肉, 鯇魚, 雞肉, 麵包(大愛), 通粉, 烏冬, 乳酪, 牛油, 紅黃青椒!
香蕉, 蘋果, 雪梨, 啤梨, 士多啤梨, 提子, 西瓜, 橙, 木瓜, 奇異果, 雪梨, 車厘子, 藍苺(吾鍾意食, 會吐返出黎)!
時間係 8:30~13:00~17:30~21:30

訓
已經同龍BB 訓大人床! 有時亦吾洗奶咀都會自己訓, 吾知幾先同佢介奶咀好呢?!

便便
已經轉左加大碼片片, 一日一至兩次, 好暢順!

發展
識講好多字, 例如: BABA, MAMA, 婆, 公, 街街, MO(會打開隻手表示物件無左), 波波, 花花, Add婆(apple), dog, 貓, Bird, 吾呀, Um(問大人食野個陣勁講), 哥(表哥), ! 英文字母都會跟到我講到幾個發音!
問佢眼, 耳, 口, 鼻, 頭, 手, 腳全部識指!
同佢講沖涼, 會即刻拖住我去厠所門口!
一講wash hand, 佢會左右手互摸扮洗手, 見親我搽hand cream, 又會做同一個動作表示要搽埋一份!
有時會跟我唱abc/twinkle little star歌, 似模似樣, 有晒韻律! 唱twinkle little star重會雙手扮星星閃!
行動好自如, 會走黎走去玩捉迷藏, 識自己扶住側邊上樓梯!

1Y1M15D~ 好專心咁睇人地射籃球!

1Y1M22D~ 又含情脈脈!

1Y1M24D~ 第一次玩SIR滑梯勁興奮, 自己擒上擒落!

1Y1M24D~ 見天氣好, 出車晒下太陽!(龍BB 扮晒識自己踩 XD)!

1Y1M25D~ 我地送比龍BB 既聖誕禮物 (事緣龍BB 有日去個EE屋企度起勢撩隻dog dog玩, 見佢咁鍾意dog dog, 所以買隻識互動既玩具dog比龍BB, 龍BB 好鍾意隻dog dog, 當佢真既一樣, 重會鍚鍚dog dog tim~

1Y1M28D~ 龍BB 勁驚尿片韆鞦, 反而依個就吾驚!
龍BB: 咁高既, 會吾會跌架!

一見到SIR滑梯, 即刻走去自己SIR, 勁大膽!

2014年1月17日星期五

玫瑰疹

1Y2M17D (2014.1.17)
龍BB 依兩個星期真係可憐豬, 事緣由1月5日開始肚痾左5日(持續肚痾)繼而再發燒3日(一直都重痾緊)最後再出埋玫瑰疹, 足足捱左兩個星期同病魔作戰, 而家龍BB 終於好返晒喇, 真係謝天謝地!

1Y2M11D (2014.1.11)
肚痾已經第7日重未好返! 依日龍BB 開始有少少燒, 一直徘徊 37.8-38.2, 我照比上次睇肚痾時醫生開定既退燒藥龍BB 食, 之後一直燒下又退咁!

1Y2M12D (2014.1.12)
肚痾已經第8日重未好返, 不過已經無痾得咁密! 龍BB 都重係Keep 住燒下又退下, 但佢重係精神奕奕, 玩得訓得, 不過就真係明顯瘦左!

1Y2M13D (2014.1.13)
半夜突然發燒就算食左退燒藥都無退過, 到朝早同龍BB 去醫院睇醫生, 當時已經見到有好多BB & 小朋友等緊! 到見醫生時先知原來依排爆發"諾沃克病毒" & "輪狀病毒", 有好多BB & 小朋友都中左招, 依兩個病徵都好似, 又係又痾又嘔又發燒, 通常都會維持兩個星期! 不過醫生話龍BB 之前口服過輪狀疫苗加上佢又無嘔, 吾似係"輪狀病毒", 之後醫生建議我地比龍BB 留院檢查! 講真, 我真係同好多老人家思想一樣覺得無咩大病大痛真係吾想入院!

我再問醫生一大輪問題!
我: 入院洗吾洗插針插喉?
E: 吾洗, 只係留意下佢發燒情況同留便便化驗!
我: 要留幾多日?
E: 一兩晚就走得!
我: 咁其實重有咩特別要做?
E: 無咩特別可做了!

其實我覺得既然無咩特別可做, 咁不如留係屋企照顧龍BB 咪重方便, 所以最後只係留左龍BB 既便便比醫生做化驗, 要等一星期先有結果, 如果無問題就吾Call 我! 另外拎左5日退燒藥同電解質粉沖比龍BB 飲!

1Y2M14D (2014.1.14)
無再肚痾同發燒了, 不過見龍BB 身上面出左好多疹, 相信依D 就係一直聽聞發燒後會出既玫瑰疹, 之前成日聽玫瑰疹係BB必經, 估吾到終於發生係龍BB 身上!其實一半開心一半擔心, 開心係見到玫瑰疹即係代表吾再發燒, 係病既尾升! 擔心係因為龍BB 第一次出玫瑰疹, 吾知會出幾耐同佢辛吾辛苦! 之後幾日都用莞茜水同龍BB 沖涼!

1Y2M17D (2014.1.17)
玫瑰疹出左3日, 今日已經完全退晒, Yeah!!
而家龍BB 好返晒, 無肚痾無燒無出疹喇, 一病完成個人即刻生猛返晒, 又玩又笑又食得! 食齋兩個星期既龍BB 今日開始亦有返肉食, 中午個餐重食左一大碗! 太好了!

希望經過今次兩星期同病魔既博鬥, 龍BB 既抵抗力會更好身體會更強壯, 吾洗要媽媽再擔心就好了 ^^

2014年1月9日星期四

持續肚痾

2014.1.9 (1Y2M9D)
本來依幾日係想寫下龍BB 13~14個月既成長, 但係龍BB 計埋今日已經持續5日肚痾, 攪到我都灰灰地無咩心機, 所以都係寫左依篇Blog 先, 吾知有無媽媽遇過咁既情況, 可否分享下!

2014.1.5 (1Y2M5D)
話說第一日龍BB 一朝早起身已經有便便(同平時一樣軟身), 之後見佢放屁多左, 但我無理佢! 到中午食完飯又好快有便便(開始有D稀), 但我都無理! 直到佢再痾第三次便便係水時先估龍BB 係咪食錯野?! 之後又再痾第四,五次便便都係水!

2014.1.6 (1Y2M6D)
到第二日如是者都痾左3次便便(稀水)同好多屁, 個pat pat都痾到紅損晒, 睇見都心痛! 本來念住同龍BB 即晚去睇醫生, 但老公又話不如睇埋聽日(第三日)先, 因為見佢比起第一日痾少左, 吾知痾清晒會吾會自然好返!

2014.1.7 (1Y2M7D)
到第三日龍BB 一起身又係即有便便(平時佢吾會一起身就有便便的), 咁我拿拿臨同龍BB 去睇醫生, 再將已經影左相既便便比醫生睇, 因為龍BB 無嘔無發燒, 醫生話吾算好嚴重, 重話最近天氣好多BB 都有咁既情況, 正常要痾7日先痾得清, 所以只係比左止肚痛藥同pat pat 膏就算! 醫生叫我依幾日只可以開稀一半奶粉同食包/粉! 依日全日又痾左4次水!

2014.1.8 (1Y2M8D)
到第四日又係如是者一起身痾左兩次, 唉......灰晒, 大人痾咁多次都辛苦啦, 更何況係小朋友, 之後我再問身邊朋友得知原來好多醫生都會比埋益生菌BB 沖黎飲(我睇個醫生係無比囉)! 依隻益生菌藥房有得賣, 所以我就自己去買一盒比龍BB, 希望可以增強佢免疫力! 依日全日痾左3次水!

2014.1.9 (1Y2M9D)
到今日第五日! 半夜零晨5點幾龍BB 大喊放好多屁, 覺得佢似係肚仔痛, 之後有便便(有D軟身, 吾再係水), 再夠鐘比止痛藥佢食, 左攪右攪一個鐘龍BB 先肯訓返, 其實都已經天光, 真係身心疲倦! 而家最希望龍BB 快D好返晒, 吾好再咁辛苦了!

其實我同老公都有念過究竟食左D咩令龍BB 肚痾, 估計可能係第一日肚痾既前一晚同佢出街食飯比左D 芝士焗豬排飯龍BB 食, 平時龍BB 好少食芝士, 吾知係咪食左芝士攪到咁呢!

2014年1月2日星期四

Blog Blog BB'S X'mas Party

2014.1.2 (1Y2M2D)
回顧返同一班 Blogger BB'S 參加由豬脾媽安排既X'mas Party, 其實而家念起都重好開心, 因為對上個次見一班BB們個陣龍BB 得7個幾月大(Blog Blog BB Gathering 30/6/2013), 個陣有好多BB都重係好BB 樣, 而且只係玩緊爬行比賽, 但係而家見返BB們已經識行識走, 好似睇到BB們既成長咁, 好得意!

2013.12.29 (1Y1M29D)
首先特別鳴謝當日豬脾媽既安排同肚B媽既相, 因為我吾記得拎大機, 所以只可以用手機影相, BB們D動作又快, 影出黎D 相好多都好模糊!
個日一出門龍BB 就訓著左, 去到現場佢都重訓到成隻豬咁, 我心念太好喇, 等佢叉足電之後玩都無咁易扭計!

以下兩張龍BB 既獨照都係出自肚B 媽, 又要再一次多謝肚B媽 & 肚B爸, 因為我真係好鍾意D 相, 當時肚B爸係龍BB 面前拋波, 氹到龍BB 笑得勁開心!