龍 B 媽之記事簿: 6月 2014

2014年6月28日星期六

PN校服相 @ 翠茵小字宙國際幼兒/稚園

1Y7M28D (2014.6.28)
今日Sat 一早起身要同龍BB 去讀PN 個間翠茵小字宙國際幼兒/稚園影校服相, 佢安排左龍BB 9:00am~10:00am 依段時間影相, 我地大約9點幾去到幼稚園已經見到勁多大人同細路等緊, 跟住我要排隊攞籌, 見到個籌同老師叫緊既no. 重有成幾十個要等, 嘩......真係眼都突埋! 原來今日重有好多K1~K3既學生等影相, 怪吾得之有咁多人等啦......本來我重念住那那臨影完相飛撲去中環睇熊貓同見下肚B, 點之最後影完都要攪到11:00am 先走得! (特別鳴謝一仔媽讓出熊貓入場卷, 我地趕吾切去睇熊貓真係好可惜)

幼稚園今日都安排幾周到, 佢地安排左D 課室比學生做下手工藝! 入到課室每個位上面都有把扇, 旁邊有幾個貼紙係比佢地貼落把扇度, 又有顏色筆畫畫!
睇下龍BB 幾認真落力完成件勞作, 我會拎佢返屋企好好收藏, 話晒都係龍BB 第一件係幼稚園親自完成既勞作呀MA!

幼稚園又安排左另一邊比學生食茶點!
龍BB 食到幾滋味成碟清晒, 食完再飲牛奶! 食飽飽之後我就叫龍BB 自己去扔垃圾!

另外幼稚園重有Sir 滑梯同活動室比學生玩消磨下D 時間! 活躍既龍BB 左玩右玩D 時間就澎澎聲咁過!

輪到龍BB 時因為未訂夏季校服, 所以要即場借左件校服比龍BB 影相, 龍BB 影相個陣都好合作乖乖企定定咁影(真係無念到佢會咁合作喎)!
但係當我離開幼稚園時先醒起當時掛住同龍BB 整理校服而吾記得自己幫佢影張校服相呀, 激C我喇~~~~~~

最後係幼稚園門口影返張補數! 加油呀龍BB, 你就快要開始你既讀書生涯喇......

2014年6月23日星期一

''Jolly Kingdom'' Playgroup

1Y7M23D (2014.6.23)
龍BB 之前一直都返開觀塘區既"Bambini" Playgroup, 直到新年個排上晒所有堂之後就停左一排無返 Playgroup! 到左5月我又同龍BB 近近地Join 左樓下商場間"Jolly Kingdom", 佢當時有個優惠係$110 試堂後Join Plan 就可以減返個試堂收費, 之後又因為我家姐個囝本身有 Join "Jolly Kingdom" 英文班(4人同行)所以比到75折我, 但報名時又要比報名費$50, 即左加右減之下 $2271/10堂, 1個鐘1堂, 平均 $227.1/堂!

由5月返到而家6月個感覺都OK, 龍BB 返左一堂已經完全適應環境同外籍老師, 由初初龍BB 吾知老師講乜到好快自己會自動跟老師指令去做, 有時我見到都覺得意外, 睇到龍BB 真係不斷學習不斷吸收不斷進步真係好開心!

其實每堂大致教既模式一樣, 開頭會先叫小朋友自己去拎張動物Mat 然後坐底唱下Hello 歌, 跟住會叫小朋友接住個波介紹完自己再將個波Pass 比隔離小朋友, 之後就會正式上堂! 當中有好多活動教學我都幾鍾意, 例如老師會比每個小朋友出去白版教寫英文字母, 會叫龍BB 將教材派比每位小朋友, 會叫每個小朋友自己拎住支匙巾將上面個玩具蛋傳比另一個學習平衡手上既玩具蛋吾比佢跌, 會教英文發音 & 筆劃, 有動物 & 交通工具既彩圖同字做配對! 其實重有好多好多不能盡錄, 最重要係我坐係龍BB 後面係無幫佢手都可以好乖咁識得自動去做老師既指令, 雖然有時龍BB 會好心急, 老師一拎野出黎會即刻走過去八掛, 但叫佢返黎佢又會乖乖走返黎坐定定! 重有另一樣龍BB 真係要讚, 有時老師會放玩具去中間叫小朋友自己去拎, 當中會有一兩個比較怕醜既小朋友吾敢自己行出去, 龍BB 會好大方咁主動將手上玩具拎比佢地之後再行返去中間再拎返比自己, 其實依個動作已經吾止見過一次, 我成日教佢要分享, 所以見到龍BB 咁大方分享真係覺得好安慰架!

"Jolly Kingdom"地方無''Bambini''大, 亦無咩玩具玩, 不過每當上完堂老師都會拎個Sir 滑梯 & Bubble入房同佢地玩一陣!

龍BB 等上堂時自我娛樂!

2014年6月12日星期四

學刷牙

1Y7M12D (2014.6.12)
話說龍BB 一直都好驚刷牙, 就算試過係佢面前做試範佢都吾肯模仿, 只要一見到支牙刷就叫定先, 可能之前試過將牙刷放入佢口, 佢覺得刷毛吉所以怕左! 自此之後我就無再迫龍BB 刷牙喇!

但直到上個月, 我見好多Blog 媽都有幫BB 們刷牙, 所以有日心血來潮拎支牙刷比佢試下, 但可惜反應一樣! 之後老公發現平時比佢睇開既 Kids Song 有首歌係有哥哥姐姐刷牙, 跟住我開住比佢睇, 嘗試比佢一路睇就一路慢慢幫佢刷牙, 重要一路刷一路讚龍BB 乖仔之類......就係咁龍BB 之後就愛上刷牙, 每次一話刷牙佢就勁開心, 開頭我會先幫佢向上刷向下刷, 跟住就會再比佢自己刷, 刷到咁上下叫佢比返支牙刷我清潔龍BB 又肯乖乖比返我, 真係無念到會突然咁順利, 因為一首歌仔就可以令龍BB 克服刷牙既恐懼, 犀利犀利......

1Y6M25D~ 刷牙刷到勁開心, 重要走去照住塊鏡刷牙, 勁得戚!

1Y6M31D~ 自己好專心咁刷牙, 之後我問龍BB 刷得乾吾乾淨, 佢重識擘大個口比我睇XD!　

龍BB 用既係360牙刷, 係之前BB 展買定, 個陣做緊優惠買五送一, 其實佢本身已經平過出面, 再買五送一就再平D! 本來佢有款係比再細D 既BB 用, 但職員話其實大家刷頭差吾多, 所以我就買定大DD 等佢有排刷!
用後感: 覺得幾好, 因為360度點轉都刷到, 最啱佢地而家D 初學者用!

2014年6月11日星期三

19個月 01 Jun 2014

1Y7M11D (2014.6.11)
回顧返18~19個月既龍BB 明顯又大個仔左D喇, 而且開始知道咩係自律, 假期同龍BB 落會所玩佢會知道要排隊先可以Sir 滑梯, 見到D 玩具跌左落地會先拎起放返原位先再走去玩, 玩完會自動將玩具收好放入箱, 有時佢見到D 細過佢既朋友仔比較怕醜, 龍BB 會主動拎玩具比佢地玩, 不過另一樣係相信龍BB 真係好鍾意同D 大過佢既朋友仔玩, 次次會企係到望實D 哥哥姐姐玩, 望完一大輪就會走埋去想同佢地一齊玩, 可惜有時有D高難度動作龍BB 都會學埋一份呢=.=" (例如吾係坐底Sir 滑梯, 而係學哥哥由Sir 滑梯上面走落去) 龍BB 真係好大膽, 當然我會即刻阻止佢啦! 另外每當龍BB 一知有街街去就會自己拎鞋仔著(識分左右腳), 有時重會拎埋比我地! 去完街一入屋又會自己除鞋再放返去原位!

雖然龍BB 有乖巧自律既一面, 但亦要講下佢曳既一面! 出親街吾肯拖大人, 攪到Daddy 成日要好似捉雞仔咁捉住佢/抱起佢吾比佢走, 但係當一阻住佢前進, 龍BB 就會扭到爆, 通常依D 咁可怕既場面都係會交返比Daddy 處理(打Pat Pat)! 龍BB 係一個好心急既小朋友, 佢想要既野要即刻比, 如果吾係會扮扭計, 所以我會教佢學習下等待, 吾係下下話要就有!

食
一樣係吾鍾意食飯, 不過見我食刺身飯佢又會好鍾意食, 但係D 飯涷都吾敢比咁多佢食, 另外河粉/通粉都好鍾意食!
進食時間 7:30/7:00(7安奶)~13:00(粉)~18:30/19:00(少飯)~21:30(7安奶)

訓
重係要我陪先肯訓, 吾知要幾大先可以訓練到佢自己訓一間房呢......

便便
一日一至兩次, 好暢順!
重未教佢介片片去洗手間! 龍BB 成日沖涼前都會手多多要禁下個沖厠制開心!
佢超鍾意沖涼, 通常去完街龍BB 會第一時間除鞋放返好, 跟住會一支箭衝去拎埋個籃球仔再自己企入浴缸等沖涼!

發展
講野進步左DD, 雖然都係會講一大輪BB 話, 但有時會聽到D簡單句子(而家每朝起身龍BB 會指住房門跟住講" Daddy 奶奶" 講多兩三次Daddy 就會彈起身沖奶, 而我就繼續訓, 哈哈...奸笑中XD)!
Oh No, 喔Oh 已經變左佢口頭蟬!
雖然講野進步左, 但係有D字仍然講得好攪笑, 例如'餅餅'讀做'丙丙'
佢好鍾意唱歌, 間中識跟住我唱幾句Little Twin Stars!
認得好多動物, 叫佢幫手抺屋企張Playmat 上面既動物, 例如Lion, Bear, Monkey 佢都會跟住抺!
上兩個月佢好驚刷牙, 而家已經好鍾意自己刷牙喇, 暫時只係用清水刷, 刷完會自動比返我清洗!

1Y6M1D~ 同表哥一人一架車車 (表哥, 你個表情洗吾洗咁奸呀 haaaa)