2014年8月BB展

1Y9M4D
又到左一年一度8月大型BB 展既時侯, 今次係因為睇中左幾樣目標所以先會Sat 去走返轉! 但由於時間關係, 我同老公行左大約3個鐘就走人, 其實重好想行耐D 架, 不過真係趕頭趕命加上一過1:00pm 放工時間D 人又湧住入場, 所以都係快買快閃!

經上年大型BB 展經驗得知"萬0"買奶粉會有大型玩具送, 我計過條數如果去藥房買"美素3"都只係每罐比正價平$4, 咁我係BB 展買正價奶粉又有玩具送真係抵好多! (又發揮我既師奶本色XD)

以下所有都係送!


3件大型玩具都有返咁上下大件, 龍BB 企埋去都差吾多Size, 托到我同老公CC 下!


首先要介紹下買咩送咩先:
"萬0" 買美素 ~~ 買6罐奶粉送玩具枱! (龍BB 食緊3號仔)


"萬0" 買美讚臣~~ 買4罐奶粉送火車 (老公有朋友要奶粉) + 2支威潔洗衣液共200ml (龍BB 一直都用緊依隻牌子)
"萬0" 購物over $12xx 包送貨, 所以吾洗自己托走!
 

 

雅培 ~~ 買4罐奶粉送煮飯仔 + 帳幕 (買左保兒加營素, 1-10歲都飲得, 我叫職員比D 最遲過期日, 06年先到期, 到時龍BB 3歲幾先比佢飲, 見家姐個囝介左奶之後都會比佢飲依隻補充下! 另外就係我一直都好想買煮飯仔比龍BB 玩, 而家可以一舉兩得)


龍BB 開頭入帳幕都好好奇, 坐一陣之後好快就開始拎玩具入去玩, 當正係自己既小天地!
 

 

其實除左"萬0", "屈臣C"/ 美讚臣自己本身買奶粉都有玩具送, 不過都係覺得"萬0"禮物吸引D!

除左奶粉, 以下就係其餘目標!


1) Nuk 奶樽 $8x ~~ 雖然話要幫龍BB 介奶樽, 但係真係需要D 時間! 而家龍BB 又會成日突然叫飲奶奶, 所以要買多個頂住當!

2) Nuk 密實袋 $17 ~~ 用開覺得幾好 (買任何野可以用單據換一袋Sample, 我分左兩次買所以有兩袋, 一袋Sample都吾止$17, 抵)

3) 360牙刷 ~~ 一支好快比龍BB 玩殘, 所以要買定幾支看門口, 買8送2 平均每支$35, 老闆認得我上年有幫襯過所以送多一支, 即係又平左, 平均31.8一支, 千色原價賣緊$5x一支!

4) Calibowl 碗 ~~ 想買好耐, 而家 $100 有一大一細 (大碗底部有吸啜功能), 一個擺去公公屋企用, 一個擺係自己度用, 另外佢再送多2支匙巾 (一支賣緊$4x)

5) Mustela 沖涼洗頭液 200ml $20 ~~ 龍BB 用緊依隻牌子沖涼, $20 一支真係勁抵!