復活節台北之旅 2015 @ Day 1

2Y5M23D (2015.4.23)
復活節假期大人小朋友齊齊放假, 決定拉大隊去台北自遊行, 對上去台灣已經係13年前! (人物: 我地一家三口, 龍BB 姨媽, 2個表姐, 表哥, 舅父), 一行８人!

今次台北之旅可算對我係一個挑戰, 以往我去旅行一定會跟團, 因為我好怕要plan 行程, 去旅行跟團有車接送有導遊plan 晒行程可以輕輕鬆鬆嘆世界! 而家去旅行要為左要方便湊住龍BB 吾洗跟團咁趕, 所以決定自己plan 行程簡單Ｄ由台北開始, 出發Go Go Go ~~

由於第一次帶龍BB 去旅行, 我都有D 驚會帶漏野, 所以幾乎乜野都帶齊, 基本上全部都係龍BB 既野, 個大喼已經爆晒, 好彩今次旅行係著夏天衫佔好少位! 龍BB 出發之前病左2星期, 好彩臨出發前兩日剛剛好返晒咁我都放心D!

2Y5M3D (2015.4.3) Day 1
正係復活節假期台灣機Full 到７彩, 我地坐個架機係３號朝早6:20am加班機, ２號要零晨到機場Check in 都真係幾眼訓!
龍BB 由出門口一直訓到去機場, 零晨3點到機場一見到表哥即刻精神晒, 一見面比個 Hi Five 先!


入閘後指定動作, 影相~~


今次係龍BB 第一次坐飛機, 佢一見到架飛機已經好興奮咁指住講 "好大架飛機, 坐飛機去旅行好開心"


一上到機覺得龍BB 有D緊張, 叫佢Say Hi 都已經硬左, 哈哈! 間中又望下隔離架飛機又講 "好大架飛機"


因為起飛會有氣壓, 所以我習慣會一直帶住個Headphone 聽住音樂等隻耳無咁辛苦, 龍BB 第一次坐飛機我好驚佢會吾適應, 所以都有幫佢帶住個Headphone 聽住音樂, 點之佢勁Enjoy, 重拎座位D 書睇成個大人咁, 真識嘆! 飛機升空一陣龍BB 好快就訓到落機喇!
 

到達台灣桃園機場, 兩老表即刻又生猛返晒! 影返張大合照先, Yeah ~~
 

我地大概11:00am 坐飛狗先到酒店寄存行理, 要等到3:00pm 先可以回酒店Check in 拎房! 所以我地放底行理就去左附近地道餐廳食個滷肉飯醫肚, 雖然樣子普通, 但又真係幾好味喎!　
 

食飽飽再係附近烘焙店買左個雞蛋布丁, 只係HKD 4X, 抵過香港甜品店好多而且重超好味!

之後出發第一站 "袖珍博物館"! 坐的士距離酒店都只係十分鐘車程, 入面吾算好大, 我地好快就行完一個圈再睇下紀念品就回程返酒店等拎房!


 
 
 

 

上左房之後個個都叫攰, 所以大家就留在房叉叉電先再出發, 龍BB 訓到成隻豬咁! 到左夜晚6點幾再出發第二站 "西門町"! 去到西門町真係勁多人, 我地一路行一路食下街邊小食, 我地重買左四箱手信返香港(免費送貨到酒店), 第一日買手信已經癲左!
 

之後搵左間網上幾好評語既牛肉麵餐廳, 真係好好好味, 牛肉大大舊又好口感, 味道重剛剛好, 男士們重要食左2 碗真誇張! 食飽後再行多陣就坐捷運返酒店叉電留待第二日行程!