第一次BBQ (二舅父生日)

1Y6M17D
依篇 Blog 係想回顧返龍BB 第一次參與二舅父慶祝生日既BBQ 活動! 話晒龍BB 都係第一次BBQ (其實係大人BBQ, 佢就周圍走無時停 =.=), 又係二舅父既生日, 所以好想記低佢!

1Y4M30D
一大清早約晒公公婆婆, 姨媽一家出發入元朗(因為我地住得好近所以約埋), 到左元朗再Join 埋大舅父一家去二舅父屋企, 二舅母好細心一早已經預備好食物! 其實當日好驚會落雨, 所以天台亦拉好晒帳篷為免燒燒下落雨! 龍BB 當日有表哥表姐陪佢玩, 我同老公就可以舒舒服服BBQ!



二舅父屋企養左兩隻貓一隻狗, 龍BB 平時係街見到D 狗狗都好大反應, 但係可以咁近距離同時接觸貓狗真係第一次! 當龍BB一入到屋見到佢地已經第一時間走過去摸佢地, 龍BB 真係一D 都吾驚(可能係未識驚先敢自己走去摸)! 佢重係咁追住摸隻貓想同佢玩, 連隻貓都怕左佢haaaaa!


我地BBQ 到大約5點幾再切埋蛋糕就走喇! 其實個日BBQ 中段都落左一陣微雨但好快又停左, 到我地夜晚各自返到屋企時天文台就掛黑雨! 所以真係天公造美, BBQ 時令我地可以好順利慶祝二舅父生日既BBQ 活動!

 龍BB: 玩到攰攰地, 坐低抖下先!
     

 

 龍BB:等我自己吉野食先! 哎呀, 比媽咪發現左tim~~
 

龍BB: 我要飲汽水, 我擰擰擰, 得左!
 

龍BB: 我要扮戰士拎住把劍打怪獸, 嘩哈哈哈......
 

 

 

 

 

2nd Happy Mother's Day 2014

1Y6M14D

今年係龍BB第二年同我過母親節，其實我好期待依一日既來臨，雖然龍BB重細未識自己送禮物比我，又未識講'MaMa I Love U', 不過只要有假放可以同龍BB對足一日咁已經覺得好滿足喇！

講起送禮物，今個母親節我真係估吾到老公會送禮物比我，佢當日中午突然話有個朋友比野佢要落樓下拎，原來佢托個朋友買左盒燕窩比我當母親節禮物，我即場笑左出黎，因為我覺得依份母親節禮物好攪笑，攪到我好似好老要補身咁，老套得黎又窩心，因為真係估吾到會有意外驚喜既母親節禮物……haaaa 

1Y6M11D

正日當日我都要同我既母親大人慶祝，一家大細book左一圍枱食晚飯，一家人齊齊整整食飯有傾有笑真係好開心，不過龍BB個晚吾知做咩個個都吾比抱，一有人抱佢就即刻用好可憐既樣係咁叫媽媽，真係話咁易就比佢溶化左我！！

1歲半健康院成績表

1Y6M10D
今日同左龍BB 返左健康院打4合1針, 其實今次依張 1歲半既成績表都算吾錯, 姑娘有讚龍BB 發展得好好! 而家龍BB 有28 lbs 重 & 80cm 高, 姑娘話佢係屬於大隻類型, 按生長線黎睇已經去到最高, 如果再重d就會變成超重, 好彩而家係啱啱到位無超標!

打針前姑娘考左以下幾樣野:
1) 比個碗同匙巾龍BB, 叫佢餵公仔食野 --- 合格
2) 疊積木 --- 合格
3) 指眼耳口鼻 --- 合格
4) 叫佢Hello & bye bye --- 合格
5) 比支筆佢畫畫 --- 合格
6) 姑娘問: 平時比咩玩具龍BB 玩? 我答: 畫版, 波波, 電話, 琴......之類
7) 姑娘 問: 聽吾聽指令, 聽覺視力好吾好? 我答: 正常
8) 姑娘問: 識吾識自己坐底起身, 手腳肌肉好吾好? 我答: 正常, 重會自己上樓梯, 擒上去玩sir 滑梯!
9) 姑娘問: 識吾識講單字?
我答: 之前肯講單字, 但係最近就少講單字, 反而講一大輪BB 話!
姑娘: 佢想模仿大人講野, 所以開始有一大輪BB 話, 但係應該要比佢由單字學起, 而家學大人講野會急左D! --- 最後姑娘叫龍BB 2歲再返去check 下講野, 不過如無特別我應該吾會返去, 因為到龍BB 2歲時已經返緊PN, 我吾想佢平日請假去, 加上朋友話到時返去都只係比本書龍BB 睇下講下野, 所以可以吾洗返!

到打4合1針時, Daddy 負責抱住龍BB, 我就負責禁住佢隻手, 其實當時見到龍BB 個驚慌眼神, 完全係覺得佢知道發生緊咩事咁, 龍BB 真係好乖坐定定等打針完全無反抗! 當一打完針, 龍BB 即時喊左一陣, 相信依支針都幾痛, 因為過往龍BB 打針係好少喊! 跟住我即刻抱返龍BB 呵返佢, 好快龍BB 又無喊繼續攪下其他野玩喇! 之後隔一星期又要再同龍BB 去私家打HIB, 真係好密呀!

到左夜晚陪龍BB 訓前飲奶時, 發覺龍BB 有D 燒, 一探熱原來已經有38.3度, 等佢一飲完奶就那那臨比藥佢食, 食完呵一陣就訓左覺喇! 希望龍BB 快D 退燒, 第二日重要係母親節, 係我好期待既節日, 重要同婆婆出街街食飯慶祝, 所以一定要快快好返呀!

送一張龍BB 既lam lam相比大家啦!