痛哭

27/8/2012(31W4D)
琴晚訓覺前發生左一段小插曲!
事緣係因為我娘家發生左D問題,依個問題由我一開始有龍BB時都已經一直滋擾住我,直到而家龍BB 8個月了,娘家件事都一直未解決!
其實依件事真係令我好困擾,有時我都會不停同自己講吾好勞氣,吾好動胎氣,所以我一直都將EQ提升,無論如何都要以龍BB為大前提,一切都要為龍BB著想!
直到琴晚,又一次要訓練我EQ,但係發生就係發生左,嬲到我終於都忍吾住大喊左出黎,當時龍B爸都好嬲好心痛,龍B爸嬲係因為個問題係發生在我娘家,佢見我一直為件事吾開心,但又做吾到D咩!另一方面,龍B爸心痛係見我咁辛苦大喊左出黎!
其實當我一直勞氣,大喊時,龍BB真係不停咁踢我,個肚重有D痛!事後當我冷靜落黎時,我同龍B爸都即刻安撫龍BB,希望龍BB吾好咁驚!而我都好怪責自己,好後悔動胎氣,驚會嚇親龍BB!
吾知依D會吾會係產前抑鬱呢?我一定要調節下先得!